Ամերիկացի հանրահայտ լրագրող և քաղաքական մեկնաբան Ռոբերտ Դրեյֆուսը The Diplomat կայքում հեղինակած իր վերջին հոդվածում գրել է. «Առաջին անգամ ԱՄՆ-ում շշուկներ են լսվում, որ նախագահ Բարաք Օբամայի կառավարությունը բանակցությունների ընթացքում նոր և ավելի ընդունելի առաջարկ է ներկայացնելու իրանական կողմին: ԱՄՆ Սենատի մի շարք աղբյուրների ու Իրանի հարցերով զբաղվող փորձագետների խոսքերով, ԱՄՆ կառավարությունը առաջարկելու է, որ Իրանը թույլտվություն ստանա իր երկրում ու ներկա պայմաններում ունեցած ցենտրիֆուգների միջոցով իրականացնել ուրանի հարստացման աշխատանքներ: Իհարկե, այդ առաջարկի նախապայմաններից կարող է լինել այն, որ Իրանը պարտավորվելու է մինչ այդ հարստացրած ուրանը տեղափոխել մի այլ երկիր, հավանաբար՝ ՌԴ, Թեհրանի փորձարարական ռեակտորի օգտագործման համար զտված ուրանը վառելաձողի տեսքով ներմուծել, իսկ մնացած ուրանը, որպես վառելանյութ, օգտագործել Բուշեհրի ատոմակայանում»։
Դրեյֆուսը վերջում մատնանշում է. «Մնացած ուրանը Բուշեհրի ատոմակայանում օգտագործելու փաստը օգնելու է Իրանին ապացուցել, որ իր միջուկային աշխատանքները խաղաղասիրական նպատակներով է իրականացնում և ոչ ռազմական»։
Հարկ է նշել, որ, իրանական Mehr գործակալության մատուցմամբ, Իրանի ԱԳՆ խոսնակ Ռամին Մեհմանփառաստը հունվարի 11-ին լրագրողների հետ ունեցած հանդիպման ընթացքում լրագրողների հարցին, թե արդյոք ԱՄՆ նման առաջարկ ներկայացրե՞լ է, պատասխանել է. «Ես այդ ուղղությամբ ոչ մի նոր բան չեմ լսել, բայց այն, որ միջուկային տեխնոլոգիա ունենալու մեր իրավունքը օրինական է, ընդունված է բոլոր մեծ ազգերի կողմից»։
