Հյուսիսային Կովկասում հանգստյան օրերին իրավիճակը սրվել է: Տարբեր վայրերում միանգամից մի քանի պայթյուն է որոտացել: Կիրակի օրը երկու պայթյուն տեղի է ունեցել Ինգուշեթիայում, մեկը` մթերային խանութից ոչ հեռու, ինչի արդյունքում ոչ ոք չի տուժել: Աշխատել է ինքնաշեն պայթուցիկ սարք, որը համարժեք է եղել 7 կգ տրոտիլի: Մյուս պայթյունը որոտացել է պահակապարեկային շարժական կետի մոտ, որի արդյունքում վիրավորվել է ոստիկանության 6 աշխատակից եւ մի պատահական անցորդ, ում տեղում օգնություն է ցուցաբերվել:
Շաբաթ օրը պայթյուն է տեղի ունեցել նաեւ Դաղստանի Խասավյուրտ քաղաքում, որի արդյունքում 70-80կգ տրոտիլին համարժեք պայթուցիկով բեռնված մեքենան մտել է ուսումնարանի հանրակացարանի բակ, եւ մահապարտ ահաբեկիչը գործադրել է պայթուցիկը: Զոհվել է մեկ զինվորական, 10 հոգի ստացել են տարբեր աստիճանի վնասվածքներ: Մեծաթիվ զոհերից հաջողվել է խուսափել այն պատճառով, որ եղել է շաբաթ օր, եւ ուսանողների մեծ մասը ուսումնարանի հանրակացարանի տարածքում չի եղել:
