«ՀՀ վարչական դատարանը 3 ամիս շարունակ փնտրում է «Համալսարանականներ» համատիրության նախագահ Արմեն Թադևոսյանին` դատական նիստի մասին նրան ծանուցագիրը հանձնելու համար»,- գրում է «Առավոտ»-ը և հավելում.
«Սակայն «Համալսարանականներ» համատիրությունն ու նրա նախագահը, պարզվում է, ընդհատակում են գործում: Նրանց գործունեության հասցեն գրանցված չէ ՀՀ որևէ տեղեկատուում: Բոլոր հնարավոր հասցեներով դատարանի ուղարկած ծանուցագրերը վերադարձվում են` հասցեատիրոջը չհայտնաբերելու պատճառով:
Համատիրությանը փնտրում է հատկապես Ինֆորմացիայի ազատության կենտրոնը, որն անցյալ տարվա նոյեմբերի 11-ին դիմել է հայցադիմումով դատարան` համատիրության նախագահ Արմեն Թադևոսյանի դեմ տեղեկատվություն չտրամադրելու և ոչ տեսանելի աշխատելու համար: Ինֆորմացիայի ազատության կենտրոնը տեղեկություններ է պահանջել Արաբկիր, Քանաքեռ-Զեյթուն վարչական շրջանի Ծարավ Աղբյուրի 55/5 շենքի վարձավճարների գնագոյացման, սպասարկման գումարների չափի, սպասարկման գումարների գնագոյացման հիմքերի մասին` խնդրելով իրենց տրամադրել «Համալսարանականներ» համատիրության 2011թ. բյուջեի պատճենը և գործունեության վերաբերյալ այլ տեղեկություններ:
Դատական հայցով կենտրոնը պահանջում է պարտավորեցնել «Համալսարանականներ» համատիրությանը` հնգօրյա ժամկետում տրամադրել հայցվող տեղեկատվությունը, ինչպես նաև պարտավորեցնել «Համալսարանականներ» համատիրությանը հայցվող տեղեկատվությունը հրապարակել հանրության համար մատչելի վայրում:
Հիշեցնենք, որ հենց այս համատիրությունն է կոչված սպասարկել ՀՀ նախագահի բարձր հովանու ներքո կառուցված, ԵՊՀ դասախոսների հաճար նախատեսված Ծարավ Աղբյուրի 55/5 շենքը: «Համալսարանականներին» գտնողներին խոստանամ ենք հրապարակային շնորհակալություն»:
