«Աբովյանում ԲՀԿ նախագահ Գագիկ Ծառուկյանի և «Քինգ դելյուքս» տրանսպորտային ընկերության տնօրեն Արթուր Հարությունյանի` հայտնի Պալաչի միջև առաջացած տրանսպորտային շարունակելի պատերազմին երեկ անդրադարձել էինք և նշել, որ Ծառուկյանը մտադիր է ևս 40-ով ավելացնել անվճար ավտոբուսների թիվը»,- գրում է «Երկիր»-ը և հավելում.
«Մեզ հայտնի դարձավ, որ ԲՀԿ նախագահի որոշման մասին բոթը հասել է նաև Պալաչին: Մեր հավաստի տեղեկություններով` երեկ Պալաչը ընկերական նեղ շրջապատում ձեռքը գլխին է խփել և ափսոսանքով նշել, թե այդ ինչ արեց: Նա անկեղծ խոստովանել է, որ անվճար ավտոբուսների պատճառով մեծ վնասներ է կրում, որոնք վերականգնել դժվար թե կարողանա, եթե Ծառուկյանը շարունակի ավելացնել անվճար ավտոբուսների թիվը»:
Թերթի աղբյուրները պնդում են, որ Պալաչն այնքան էր մտահոգված ստեղծված իրավիճակից, որ պատրաստ է ունեցվածքը ծախել և մեկնել Եվրոպա:
«Աբովյանում շշուկներ կան, որ Պալաչին ՀՀԿ-ն օգտագործեց սեփական նպատակների համար` լարելով Ծառուկյանի դեմ, բայց երբ եկավ Պալաչի կողքին կանգնելու պահը` նրան մենակ թողեց, ինչից էլ Պալաչն ամենաշատն է հիասթափվել»:
