Երևանում հացի թանկացում դեռ չկա, թեև Գյումրիում անցած շաբաթ հացը 10-20 դրամով թանկացել էր, ինչն արտադրողները բացատրել էին ալյուրի գնի բարձրացմամբ: Տնտեսական մրցակցության պաշտպանության պետական հանձնաժողովի նախագահ Արտակ Շաբոյանն «Առաջին լրատվական»-ին տեղեկացրեց, որ մոնիտորինգ է իրականացվում Երևանի 5-6 գերիշխող դիրք ունեցող սուպերմարկետներում:
«Հացի գների թանկացում չկա: Զուգահեռ նաև ալյուրի գների մոնիտորինգ ենք իրականացնում ալյուր արտադրող և վաճառող գերիշխող ընկերությունների՝ «Ալեքս Գրիգ»-ի և «Մանանա գրեյն»-ի մոտ, և այստեղ կա գների բարձացում: Մասնավորապես՝ բարձր տեսակի ալյուրի գինը տարվա սկզբից բարձրացել է 9%-ով»,- ասաց Ա. Շաբոյանը:
Ալյուրի թանկացման հիմնավորվածությունը պարզելու համար ՏՄՊՊՀ-ն տեղեկատվություն է պահանջել այդ տնտեսվարող սուբյեկտներից, նաև դիտարկվում են միջազգային այն շուկաները, որտեղից մեր ներկրողները ձեռք են բերում ցորեն, հատկապես ռուսաստանյան շուկաները: Ըստ Ա. Շաբոյանի՝ այնտեղ ցորենի թանկացումն ավելի շուտ էր սկսվել. դեռ հունվարի կեսին արձանագրվել է առաջին թանկացումը, փետրվարի սկզբին՝ երկրորդը:
Միջազգային փորձագետների գնահատականներով՝ այս թանկացումը ռուսական ցորենի նկատմամբ հիմնականում կտրուկ պահանջարկի աճով է բացատրվում: Փետրվարին որոշ չափով թուլացել է պահանջարկը, և որոշ չափով գներն իջել են:
«Բայց ամեն դեպքում, եթե տարվա սկզբից նայենք, 24-25%-ով ցորենի գների բարձրացում կա»,- նշեց Ա. Շաբոյանը:
