Ավստրալիայի Նոր Հարավային Ուելս նահանգում, որտեղ գտնվում է երկրի ամենամեծ քաղաք Սիդնեյը, տեղի ունեցած ջրհեղեղի պատճառով տարհանվել է ավելի քան 2 հազար մարդ:
Այս պահին Նոր Հարավային Ուելսի տարածքի ավելի քան 75 տոկոսը հեղեղված է կամ շատ արագ կարող է հեղեղվել: Ցավոք, մետեորոլոգների կանխատեսումները մխիթարիչ չեն. ուժեղ անձրևները, որոնք Սիդնեյում և դրա մոտակայքում սկսվել են երկու օր առաջ, ամենայն հավանականությամբ, կարճ ընդհատումներով կշարունակվեն մինչև կիրակի:
Միայն վերջին օրերի ընթացքում փրկարարական ծառայության թեժ գիծը ստացել է ավելի քան հազար զանգ՝ օգնության տրամադրելու խնդրանքով:
Իսկ հենց Սիդնեյում անձրևները կարճ ընդմիջումներով շարունակվում են արդեն ավելի քան երկու օր: Սակայն
իրավիճակը քաղաքում բացարձակապես հանգիստ է, մարդիկ ապրում են իրենց սովորական կյանքով՝ չնայած անձրևի հետևանքով առաջացած ճանապարհային խցանումներին: Բացի այդ, բոլոր խանութներից անհետացել են հովանոցները,- տեղեկացրել է ИТАР-ТАСС-ի աշխատակիցը:
Հետաքրքրական է, որ փետրվարը՝ Ավստրալիայի ամռան վերջին ամիսը, և մարտը՝ աշնան առաջին ամիսը, Նոր Հարավային Ուելսում սովորաբար չորային են լինում: Իսկ այս տարի իրավիճակը հակառակն է:
Այսպես՝ երկրի մայրաքաղաք Կանբերան մեկ օրում ստացել է տեղումների ամսական չափաքանակը:
