Փետրվարի 29-ի երեկոյան Լոնդոնում տեղի է ունեցել բրիտանական New Musical Express (NME) երաժշտական ամսագրի մրցանակաբաշխությունը: NME Awards 2012-ի հավակնորդների թվում են եղել Ֆլորենս Ուելչը, նրա Florence and The Machine խումբը, ինչպես նաև The Horrors, Arctic Monkeys, Vaccines, Kasabian, Foo Fighters և Hurts խմբերը, հաղորդվում է ամսագրի կայքում:
Մրցանակ ստանալով «Լավագույն սոլո կատարող» անվանակարգում՝ Florence and The Machine-ի վոկալիստ Ֆլորենս Ուելչը կատակել է, որ չնայած ինքը կոնկրետ չգիտի՝ արդյոք ինքը խմբի անդամ է, թե սոլո կատարող, բայց, միևնուն է, մրցանակը հետ չի տա:
Florence and The Machine խմբի Shake It Out երգը հաղթող է ճանաչվել «Լավագույն երգ» անվանակարգում: «Լավագույն ալբոմ» անվանակարգում մրցանակը ստացել է The Horrors խումբը իր Skying ալբոմի համար:
Լավագույն բրիոտանական խումբ է ճանաչվել է Kasabian-ը, որն իր հաղթանակը նվիրել է երեկ վախճանված The Monkees խմբի վոկալիստ Դեյվի Ջոունսին: Այս անվանակարգում նրա հետ մրցակցում էին Arctic Monkeys, Bombay Bicycle Club, The Horrors և Muse խմբերը:
Լավագույն արտասահմանյան խումբ է ճանաչվել ամերկյան Foo Fighters խումբը, իսկ լավագույն նոր խումբ՝ The Vaccines-ը: «Լավագույն տեսահոլովակ» անվանակարգում մրցանակը տրվել է Hurts խմբին՝ Sunday տեսահոլովակի համար, իսկ «Լավագույն համերգային խումբ» մրցանակը տրվել է Arctic Monkeys-ին: Վերջինս մրցանակաբաշխությանը ներկայացված էր 7 անվանակարգերում:
Oasis խմբի նախկին առաջնորդ Նոէլ Գալլահերը ստացել է «Աստվածանման տաղանդ» (Godlike Genius Award) մրցանակը:
