Այն, որ «Բարգավաճ Հայաստան» կուսակցության նախագահ Գագիկ Ծառուկյանը խորհրդարանի առաջիկա ընտրությանը համաձայնել է խաղալ Սերժ Սարգսյանի խաղը, և որ Սարգսյանին հաջողվել է, այսպես ասած, բեկել Ծառուկյանին, ակնհայտ է դառնում այն փաստից, որ «Բարգավաճ Հայաստանը» ոչ բոլոր ընտրատարածքներում է առաջադրելու մեծամասնական թեկնածուներ: ՄԱԿ համագումարին ողջունելով այդ կուսակցության միացումը ԲՀԿ համամասնական ցուցակին՝ Գագիկ Ծառուկյանը լրագրողների հետ ճեպազրույցի ընթացքում հաստատել է, որ թեկնածուներ են առաջադրելու միայն այնտեղ, որտեղ ունեն «համապատասխան մարդիկ»:
Մինչ այդ «Բարգավաճ Հայաստանը» հայտարարում էր բոլոր 41 ընտրատարածքներում էլ թեկնածու առաջադրելու որոշման մասին: Ավելին, նույնիսկ հայտարարվում էր, որ «Բարգավաճ Հայաստանի» նախագահը հանձնարարել է կուսակցության բոլոր կառույցներին, որ առաջարկեն ամեն ընտրատարածքի համար առնվազն երկու-երեք թեկնածու, որպեսզի նրանց միջից էլ ընտրվի տվյալ ընտրատարածքում առաջադրվելիք ամենաուժեղն ու ամենաանցողիկը: Հիմա պարզվում է, որ «Բարգավաճ Հայաստանը» մտադիր չէ բոլոր տեղերում առաջադրել թեկնածուներ: Ինչ պատահեց հանկարծ: Մի՞թե այդ բազմամարդ և հզոր կուսակցությունը, ինչպես ինքն իրեն ներկայացնում է «Բարգավաճ Հայաստանը», չունի ընդամենը 41 մարդ, որոնք կարող են լինել պատգամավորության թեկնածու: Հիշեցնենք՝ խոսքն ընդամենը պատգամավորության, ոչ թե, ասենք, նախագահի թեկնածու լինելու մասին է:
Հարկ եղած դեպքում, իհարկե, «Բարգավաճ Հայաստանը» 41 էլ, 51 էլ կգտներ, եթե լիներ Սերժ Սարգսյանին տհաճություն պատճառելու խնդիր, բայց, ըստ ամենայնի, Գագիկ Ծառուկյանը պայմանավորվել է այդպիսի բան չանել, և այդ պայմանավորվածության մասին էր հենց փետրվարի 13-ի հայտարարությունը խաղի քաղաքակիրթ և հանդուրժողական կանոնների մասին: Հենց այդ պայմանավորվածության արդյունքում, ըստ երևույթին, ազատության մեջ հայտնվեց Բանգլադեշի Համոն՝ Գագիկ Ծառուկյանի ամենամերձավոր զինակիցներից մեկը, տեղերում նրա համար աշխատող, այսպես ասած, հրամանատարներից մեկը:
Համոյի ձերբակալությունն ու կալանքը, ըստ երևույթին, տվեցին արդյունք և Սերժ Սարգսյանը կարծես թե գտավ Ծառուկյանի թույլ տեղը: Համոն, իհարկե, հիմա էլ կաշխատի Ծառուկյանի համար, բայց նրա աշխատանքի պտուղներն արդեն կքաղի Սերժ Սարգսյանը, ինչի վկայությունն էլ հենց մեծամասնական տեղերի մի զգալի մասից ԲՀԿ-ի հրաժարվելու հանգամանքն է: Դա վկայում է Սերժ Սարգսյանի և Գագիկ Ծառուկյանի գլոբալ պայմանավորվածության մասին, ինչից, բնականաբար, տեղյակ չեն շարքերը ու տեղյակ չեն էլ լինի: Շարքերին, հակառակը կփորձեն համոզել, որ տեսեք՝ հիմա ինչպես ենք ՀՀԿ-ից վերցնում իշխանությունը մեր ունեցած ձայներով: Բայց շարքերն, ըստ երևույթին, կհիշեն այդ ամենը մեկ անգամ արդեն տեսած լինելը 2007 թվականին, երբ հաշված ժամերի ընթաքում 400 հազարանոց ԲՀԿ-ց ընդամենը կեսը մնաց:
