Այսօր 4 ժամով Իտալիայի ամբողջ տարածքում կդադարի աշխատել հասարակական տրանսպորտը, գնացքները, շոգենավերը՝ կապված տրասնպորտի ոլորտի աշխատակիցների գործադուլի հետ:
Ինչպես հաղորդում է RIA Novosti-ն, հերթական համընդհանուր գործադուլի կազմակերպիչները տրանսպորտի խոշոր արհմիություններն են, որոնք մասնավորապես դժգոհում են, որ Իտալիայի կառավարությունը քիչ ուշադրություն է դարձնում երկրի տրանսպորտային համակարգի զարգացմանը:
Գործադուլի պատճառով Ապենիններում տեղի ժամանակով ժամը 14:00-18:00-ը ընկած ժամանակահատվածում անհնար կլինի օգտվել հասարակական տրանսպորտից:
Գործադուլին կմասնակցեն նաև նավահանգիստների, ավտոդպրոցների, մեքենաների վարձույթի աշխատակիցները, բեռնատարների վարորդները: Սակայն այս անգամ գործադուլին չեն մասնակցում օդային տրասնպորտի ներկայացուցիչները:
Սա կլինի Ապենիններում մարտին սպասվող գործադուլների շարքի առաջին ակցիան՝ ուղղված երկրի կառավարության կոշտ տնտեսական միջոցառումների դեմ: Մասնավորապես՝ տեղի ԶԼՄ-ները նշում են, որ մարտի 3-ին աշխատանքի դուրս չեն գա կրթական համակարգի, մարտի 9-ին՝ մեքենաշինական ճյուղի աշխատակիցները: Մարտի 15-ին կսկսվի փաստաբանների գործադուլը, որը կշարունակվի մինչև մարտի 23-ը, իսկ մարտի 30-ին գործադուլավորներին կմիանան դեղագործները:
