Ֆրանսիայի Սահմանադրական խորհրդի որոշումից հետո ևս Գյումրիում մեկ ամիս առաջ ծնված փոքրիկ Սարկոզին կկրի նույն անունը: Հունվարի 25-ին հայկական լրատվամիջոցներում մեծ քննարկումների արժանացավ նույն օրը ծնված և Սարկոզի անվանակոչված գյումրեցի փոքրիկը: Մեկ ամսից ավելի է, ինչ Գյումրիի 8 հոգանոց ընտանիքի ամենակրտսեր անդամը ապրում է Սարկոզի անունով: «Առաջին լրատվական»-ի հետ զրույցում փոքրիկ Սարկոզիի մայրը՝ Նառա Ավետիսյանը, ասաց, որ չեն փոշմանել, որ երեխային անվանել են ի պատիվ Ֆրանսիայի նախագահ Նիկոլա Սարկոզիի:
Անդրադառնալով երեխային Սարկոզի անվանակոչելու որոշմանը` նա ասաց, որ որոշումը կայացվել է բազմանդամ ընտանիքի անդամների կողմից՝ որպես շնորհակալություն Սարկոզիին և Ֆրանսիայի Սենատին Ցեղասպանության հերքումը քրեականացնող օրինագծի ընդունման համար: «Բոլորս հայրենասեր ենք և պայքարում ենք, որ ընդունեն այդ օրինագիծը, դրա համար ցանկացանք նրան այդպես կնքել, որպեսզի փոքրիկի համար նույնպես հիշարժան դառնա այդ օրը, և նա իմանա, թե ինչպիսի զարգացումներ են եղել իր ծնվելու օրերին»,- նշեց Սարկոզի Ավետիսյանի մայրը`հավելելով, որ ուրախ կլինեին, որ այդ ամենը հաղթահարվեր:
Երեկ Ֆրանսիայի Սահմանադրական խորհրդում Ցեղասպանության հերքումը քրեականացնող օրինագծի հակասահմանադրական ճանաչվելու մասին Նառա Ավետիսյանը ոչինչ չգիտեր. ասաց, որ ժամանակ չի ունեցել տեղեկանալու, թե ինչ ճակատագիր է ունեցել «Հայկական օրինագիծը», սակայն ամեն դեպքում ընդգծեց, որ երեխային Սարկոզի անվանելու համար չեն փոշմանել: Հիշեցնենք, որ երեկ Ֆրանսիայի Սահմանադրական խորհուրդը հակասահմանադրական ճանաչեց Ցեղասպանության հերքումը քրեականացնող օրինագիծը, որից հետո Ֆրանսիայի նախագահ Նիկոլա Սարկոզին հանձնարարեց մշակել նոր օրինագիծ:
