Փետրվարի 28-ին Տավուշի մարզի ընդհանուր իրավասության դատարանում «Մեհրաբներ» զորամասում մահացած լեյտենանտ Արտակ Նազարյանի մահվան գործով դատական նիստը ընթացել է մի այնպիսի մթնոլորտում, որը դատական նիստը Երևանում անցկացնելու դեպքում դատարանում ակնհայտորեն չէր կարող տիրել: «Առաջին լրատվական»-ի հետ զրույցում այս մասին պատմեց ու դատական նիստը ներկայացնող խոսուն օրինակ բերեց Արտակ Նազարյանի իրավահաջորդ Ծովինար Նազարյանը։
Մասնավորապես՝ երբ նիստի ժամանակ ամբաստանայլների փաստաբաններից մեկին ինչ-որ բան դուր չի եկել և բարձրաձայն ասել է` չհասկացա, դատախազը պատասխանել` կհասկանաք, դատավոր Սամվել Մարդանյանն էլ ընդհատել է` էստեղ ես եմ հասկացնողը…
«Պատկերացրեք միայն, թե ինչ ոճի դատավարություն է ընթանում, դրա համար էլ Երևանից հեռացրին, որ ազատ զգան անգամ քաղաքավարության կանոնները պահպանելու կամ չպահպանելու հարցում»,- մեզ հետ զրույցում նշեց Ծովինար Նազարյանը, որը նաև ընդգծեց, որ դատավարության հետագա ընթացքին և մասնավորապես վկաների հարցաքննությանը տուժող կողմի իրավահաջորդներն ու ներկայացուցիչները մասնակցելու են:
Իսկ երեկվա նիստի ընթացքում դատարանում շարունակվել է գործով առանցքային վկաներից Արման Մնացականյանի հացաքննության տեսատարբերակի ցուցադրումը, որը սկսվել էր դեռ նախորդ նիստի ժամանակ: Նախորդ դատական նիստի ընթացքում հրապարակվել էին նաև Արման Մնացականյանի նախաքննական ցուցմունքները, որից հետո դատարանը հրապարակել էր նաև առերեսումներից միայն Արման Մնացականյանի պատասխանները:
Տուժող կողմի իրավահաջորդ Ծովինար Նազարյանը «Առաջին լրատվական»-ին հայտնեց, որ տուժող կողմը չի մասնակցել Արման Մնացականյանի ցուցմունքների տեսաձայնագրության դիտմանը, որն, ի դեպ, իրենք չէին էլ տեսել. «Քննիչը մեզ միայն մի մասն էր տրամադրել»,- նշում է տուժող կողմի իրավահաջորդը:
Տուժող կողմը մասնակցել է տեսաձայնագրումից հետո գործով վկա Արտակ Հովհաննիսյանի ցուցմունքերի հրապարակմանը, որը եղել է Արտակ Նազարյանի տեղակալը:
Ամբաստանյալներից մեկի պաշտպան Ալվարդ Մնացականյանը «Առաջին լրատավական»-ին հայտնեց, որ այս վկան դատախազության համար կարևոր նշանակություն ունեցող վկաներից մեկն է, որի հակասական ցուցմունքներով էլ իր պաշտպանյալները մինչ օրս ազատազրկված են: Իսկ տուժողի իրավահաջորդ Ծովինար Նազարյանի խոսքով` հարցաքննված վկա Արտակ Հովհաննիսյանն այն 4 զինծառայողներից մեկն է, որոնք նախաքննության վարկածը նկարելու վրձինն են եղել:
Երեկվա նիստում վկայի ցուցմունքներից հետո, որի ընթացքում, ի դեպ, նա նշել է, թե չի կարողանում պատմել, պարտադրելով չի և այլն, նրան սկսել են հարցաքննել երկու մեղադրող դատախազները:
«Երիտասարդը գնում էր եղբորս վարկաբեկելու ճանապարհով, թեև ինքն իր նախաքննական ցուցմունքներում խոստովանում է, որ հենց ինքը հարգված չէր զորմասում, քանի որ նախկինում ոստիկան է եղել»,- նշեց Ծովինար Նազարյանը` հավելելով, որ վկա Արտակ Հովհաննիսյանի ցուցմունքները շատ հակասական են, որոնց վերաբերյալ հաջորդ նիստի ժամանակ հարցեր կուղղի տուժող կողմը:
Դատաքննության այս փուլում հարցաքննվելու են դատախազության դատակոչած վկաները, իսկ ամբողջ դատաքննության ավարտից հետո, երբ տուժողի իրավահաջորդ Ծովինար Նազարյանն էլ ցուցմունք կտա, մեղադրյալներն էլ ցուցմունքներ կտան ու կպատասխանեն հարցերին, ապացույցներն էլ կհետազոտվեն, տուժող կողմը վերջապես կկարողանա լրացուցիչ վկաներ հրավիրելու և այլ միջնորդություններ ներկայացնել դատարանին:
Նշենք, որ վերջին մի քանի դատական նիստերը նկարահանվում են պաշտպանության նախարարության կողմից:
Դատական հաջորդ նիստը տեղի կունենա մարտի 6-ին՝ ժամը 12.00-ին:
