Մեքսիկացի ռոք կիթառահար Կառլոս Սանտանան պատրաստվում է նոր ալբոմի ձայնագրությանը, որը կդառնա երաժիշտի թվով 36-րդը:
Ինչպես հաղորդում է Billboard-ը, Shape Shifter անվամբ ձայնասկավառակը կթողարկվի 2012 թ. մայիսի 15-ին նրա սեփական Starfaith լեյբլի կողմից:
Կիթառահարի խոսքով` դա լինելու է ամբողջությամբ գործիքային և «շատ անձնական աշխատանք»: Այլ երաժշտական կատարումների թվում տեղ են գտնելու նաև Shape Shifter, Nomad, Dom և Never the Same Again ստեղծագործությունները:
Ավելին, մոտ ապագայում Սանտանան ծրագրում է ձայնագրել ևս երկու ալբոմ` մեկն իր խմբի, մյուսը` կնոջ` Սինդի Բլեքմենի և եղբոր` Խորխեի հետ:
Մայիսից Սանտանան երկու տարի մշտապես ելույթ կունենա Լաս Վեգասի House of Blues համերգասրահում: Միայն այս տարի նախատեսված է երաժշտի 45 համերգ:
Իր նոր ձայնասկավառակները Սանտանան մտադիր է ձայնագրել համերգների միջև ընկած ժամանակահատվածում:
Ռոք ոճում Կառլոս Սանտանան համարվում է ամենահաջողակ կիթառահարներից մեկը: Նրան ու Մայքլ Ջեքսոնին են պատկանում ամենաշատ թվով «Գրեմմի» մրցանակները` ստացած մեկ արարողության ժամանակ։ 2000 թ. ստացել է 8 «Ոսկե գրամոֆոն» իր Supernatural ալբոմի համար: