«Արտակարգ դրության իրավական ռեժիմի մասին» օրինագիծը հակասահմանադրական է, և որքան էլ իշխանությունները փորձեն դրանում փոփոխություններ կատարել, միևնույն է, բոլոր արդարացումները հեքիաթներ են: «Առաջին լրատվական»-ի հետ զրույցում այս մասին ասաց Հելսինկյան ասոցիացիայի նախագահ, իրավապաշտպան Միքայել Դանիելյանը:
«Ինչքան էլ ասեն՝ այսպես ենք անելու, այնպես ենք անելու, բանակը ժողովրդի դեմ դուրս չենք բերելու, մենք այդ ամենը վաղուց լսել ենք: Սա արվում է միայն մի բանի համար՝ պետք եղած ժամանակ լռեցնել ընդդիմությանը»,- նշեց նա:
Միքայել Դանիելյանի խոսքով, հայաստանյան իշխանություններն ամեն ինչ կարող են և նրանց համար խնդիր չէ այս օրինագիծն ընդունել տալը: «Այս օրինագիծն անպայման օրենք կդառնա: Բա այսքան չարչարվում են ինչի՞ համար. որ մինչև ընտրությունները «Արտակարգ դրության իրավական ռեժիմի մասին» օրինագիծն ընդունվի»:
Ամփոփելով՝ Հելսինկյան ասոցիացիայի նախագահը տեղեկացրեց, որ իրենք պատրաստվում են նամակ հղել միջազգային իրավապաշտպան մի շարք կազմակերպությունների՝ կոչ անելով ինչպես այս, այնպես էլ ՀՀ Ազգային ժողովում գտնվող մի շարք այլ օրինագծերի «դեմն առնել»:
Նշենք, որ այսօր խորհրդարանի նիստում «Արտակարգ դրության իրավական ռեժիմի մասին» օրինագծի քննարկումներ են տեղի ունեցել: Հիշեցնենք նաև, որ դեռ 2007 թվականին երկու անգամ փորձ էր արվել շրջանառության մեջ դնել նմանատիպ նախագիծ, սակայն այդ փորձերը հաջողությամբ չէին պսակվել:
