Տավուշի մարզի զորամասերից մեկի անցագրային կետի մոտ դեկտեմբերի 31-ին` ժամը 23.00-ի սահմաններում, Իջևանի գնդի հրամանատար Սերգեյ Կարապետյանի և գետահովիտցի 4 երիտասարդների միջև տեղի ունեցած միջադեպի հետևանքով գանգուղեղային ծանր վնասվածքներ ստացած 20-ամյա Տարոն Ենգիբարյանը հունվարի 10-ին մահացել է Երևանի «Սուրբ Գրիգոր Լուսավորիչ» բժշկական կենտրոնի վերակենդանացման բաժանմունքում: Տասը օր շարունակ նա շնչում էր արհեստական շնչառության սարքի օգնությամբ:
Հիշեցնենք, որ գնդապետ Ս. Կարապետյանը հսկիչ-անցագրային կետի մոտ նկատել էր զորամասին հարակից Գետահովիտ գյուղի չորս բնակիչների, ովքեր զորամասում պայմանագրային հիմունքներով ծառայող իրենց հիվանդ ընկերոջ համար դեղորայք էին տարել: Գնդի հրամանատարը զրույցի էր բռնվել երիտասարդների հետ և պահանջել հեռանալ տարածքից, և երբ վերջիններս պատրաստվել էին մեքենայով հեռանալ, Ս. Կարապետյանը հայհոյել էր նրանց: Տղաները հայհոյանքին համարժեք պատասխան էին տվել, որից հետո էլ ծեծկռտուք էր սկսվել: Երիտասարդները նստել էին ավտոմեքենան, որ հեռանան, սակայն հրամանատարը հրազենով կրակել էր մեքենայի վրա: Վախենալով, որ մեքենայում տեղադրված գազի բալոնը կարող է պայթել, երիտասարդներն իջել են մեքենայից: Զորամասի հրամանատարի պահանջով մի քանի սպաներ տղաներին բռնել են և տարել զորամասի շտաբ` հրամանատարի աշխատասենյակ: Ըստ նախնական տվյալների` գնդապետ Ս. Կարապետյանը, ով եղել է ալկոհոլի ազդեցության տակ, իր աշխատասենյակում ենթակա սպաների օգնությամբ ահաբեկել է տղաներին, ծեծել, հայհոյել, սպառնացել սպանել, փորձել է կտրել տղաների մազերը և հրազենն ուղղել տղաների ուղղությամբ: Բարեբախտաբար, ձգանը քաշելու պահին ներկաներից մեկը փորձել է խանգարել և փողը դեպի վեր է ուղղել: Երիտասարդներից ոմանք վախից ցատկել են երկրորդ հարկում գտնվող սենյակի պատուհանից, ինչի արդյունքում Տարոն Ենգիբարյանը գլխով հարվածել գետնին և ծանր վիճակում անմիջապես տեղափոխվել Իջևանի, ապա Երևանի հիվանդանոցներից մեկը: 21-ամյա Աշոտ Սպարտակի Ուլիխանյանը ստացել է ձախ սրունքի ստորին երրորդ փակ կոտրվածք: Մյուսները նույնպես վնասվածքներ ունեն, բայց ավելի շատ հոգեբանական ծանր վիճակում են:
ՀՀ պաշտպանության նախարար Սեյրան Օհանյանի հրամանով զորամասի հրամանատար, գնդապետ Սերգեյ Կարապետյանն ազատվել է աշխատանքից: Գնդապետը ձերբակալված է, և պահվում է Երևանում: