Միացյալ Նահանգները դիմել է Ռուսաստանին և Չինաստանին` առաջարկելով ճնշումներ սկսել Բաշար Ալ-Ասադի ռեժիմի դեմ` բռնությունները դադարեցնելու համար: RIA-Novosti գործակալության փոխանցմամբ`այս մասին երեկ հայտարարել է ԱՄՆ պետքարտուղարության պաշտոնական ներկայացուցիչ Վիկտորյա Նյուլանդը:
«Մենք բանակցություններ ենք վարում Ռուսաստանի և Չինաստանի, ինչպես նաև այն երկրների հետ, որոնք շարունակում են աջակցել Ասադի ռեժիմը: Չնայած այն փաստին, որ Սիրիայի ռեժիմի նկատմամբ ճնշումների շուրջ հակասություններ կան, այդուհանդերձ նրանք պետք է օգտագործեն իրենց ազդեցությունը` համոզելու Ասադին դադարեցնել բռնությունները և հնարավորություն տալ հումանիտար օգնություն հասցնել այդ բնակավայրեր: Մենք պետք է օգնենք Սիրիայի ժողովրդին»,- ասել է Նյուլանդը:
Հիշեցնենք, որ ընդդիմության տվյալներով` միայն երեկ սպանվել է 144 մարդ: Սակայն այլ աղբյուրներից հնարավոր չի լինում ճշտել այս թվի իսկությունը:
