Այսօր ԱԺ հերթական քառօրյային մասնակցում էին գործարար պատգամավորներ, ՀՖՖ նախագահ Ռուբեն Հայրապետյանը և Սամվել Ալեքսանյանը:
«Առաջին լրատվական»-ը փորձեց ճշտել Ռուբեն Հայրապետյանից, թե արդյո՞ք նրա որոշումը վերջնական է, և նա առաջադրվելու է հաջորդ խորհրդարանական ընտրություններում՝ որպես պատգամավոր. «Ինչքան լրագրող կա՝ էդ հարցը ինձ պետք է տա, ես հայտարարել եմ` վերցրեք կարդացեք»:
«Առաջին լրատվական»-ի դիտարկմանը, որ անցյալ շաբաթ մամուլում տեղեկություններ են հրապարակվել, համաձայն որոնց՝ Ռուբեն Հայրապետյանի վրա հղում կատարելով՝ տեղեկանում էինք, որ նրա մասով Հայաստանի Հանրապետական կուսակցության որոշումն արդեն հստակ է` առաջիկա խորհրդարանական ընտրություններին Ռ. Հայրապետյանը կմասնակցի մեծամասնական ընտրակարգով: Ուստի նրան հարցրինք, թե ինչո՞վ է պայմանավորված նման որոշումը, ի՞նչ ծրագրեր է նա անավարտ թողել, որ որոշել է, թե հաջորդ խորհրդարանում էլ պետք է լինի. «Ես ձեզ նման բա՞ն եմ ասել, ես հայտարարել եմ, վերցրեք կարդացեք: Որ գիտեք` ինչի՞ եք հարցնում»,- հակադարձեց Ռուբեն Հայրապետյանը:
Քիչ անց արդեն Ռ. Հայրապետյանը ԱԺ միջանցքներում իրեն սպասող լրագրողներին պարզաբանեց, թե վերջնական որոշում չկա, բայց կարծում է, որ կառաջադրի թեկնածությունը: Լրագրողների հարցին, թե նախկինում էլ հայտարարել էր, որ հրաժարվում է և չի առաջադրվի հաջորդ խորհրդարանական ընտրություններին` Ռ. Հայրապետյանը պատասխանեց. «Հիմա էլ հայտարարում եմ, որ դնում եմ, ի՞նչ է եղել… Դա իմ իրավունքը չի՞: Թե՞ կարող է պատահի՝ դա ինձ արգելում էր երկրորդ հայտարարություն անել»:
Ռ. Հայրապետյանը նշեց նաև, որ դեռևս չի որոշել, թե որ ընտրատարածքից է առաջադրվելու. «Հնարավոր է՝ նույնիսկ Կենտրոնում առաջադրվեմ կամ Զեյթունում առաջադրվեմ: Ես Հայաստանի Հանրապետության քաղաքացի եմ, որտեղ ուզեմ` այնտեղ էլ կառաջադրվեմ»:
Նույն հարցը «Առաջին լրատվական»-ը ուղղեց նաև Սամվել Ալեքսյանյանին` վերջնակա՞ն է որոշումը, որ առաջադրվելու է: «Ես, այո, առաջադրվելու եմ»,- պատասխանեց Սամվել Ալեքսանյանը: Մեր հարցին` մեծածամասնականո՞վ, Ս. Ալեքսանյանը դրական պատասխանեց: Նրանից փորձեցինք նաև ճշտել, թե արդյո՞ք նույն ընտրատարածքում կառաջադրվի, Ս. Ալեքսանյանը դարձյալ դրական պատասխանեց:
«Իսկ ի՞նչ ծրագրեր են անավարտ մնացել, որ Ս. Ալեքսանյանը որոշել է դարձյալ պատգամավոր դառնալ». «Առաջին լրատվական»-ի հարցին պատգամավորը պատասխանեց. «Բոլոր ծրագրերն էլ իրականացրել ենք, ինչ էլ կիսատ է մնացել` կիրականացնենք»:
Լուսանկարը` Գագիկ Շամշյանի
