Ըստ ԱՄՆ-ի շրջակա միջավայրի պահպանման գործակալության՝ Washington Post պարբերականում հրապարակած տվյալների՝ տարեկան ավելի քան 3.5 միլիոն ամերիկացի թունավորվում են երկրի լողափերի ջրի մանրէային աղտոտման հետևանքով:
Հենց այս պատճառով է, որ բնապահպանները քննադատել են փետրվարին Օբամայի վարչակազմի արած առաջարկը` 2013 թվից երկրի բոլոր նահանգներում կրճատել լողափերի աղտոտման վերահսկողության աշխատանքների ֆինանսավորումը,- նշում է պարբերականը:
ԱՄՆ շրջակա միջավայրի պահպանության գործակալությունը 2000 թվից` համապատասխան օրենքի ընդունման պահից, ծախսել է ավելի քան 110 մլն դոլար ծովափերի աղտոտման ստուգման աշխատանքների վրա:
Անցյալ տարի պետությունը ծախսել է 10 մլն դոլար: Սակայն խնդիրն այն է, որ յուրաքանչյուր նահանգ այդքան գումար չի կարող տրամադրել:
Կալիֆոռնիան, որն այս տարի ստացել է 507 հազար դոլար ջրի որակի թեստավորման համար, ստիպված է զգալիորեն նվազեցնել ծախսերը այս աշխատանքներում, թեև ծովափնյա զբոսաշրջությունը նահանգին բերում է մոտ 11 մլրդ դոլարի եկամուտ:
Որոշ նահանգներում իշխանությունները ստիպված կլինեն փակել լողափերը, կրճատել աշխատակիցներին և ջրի փորձարկումների քանակը,- հայտնում է Washington Post-ը:
