«Արդեն 20 տարի է, ինչ ադրբեջանական պաշտոնական քարոզչությունը դաժան և անզիջում տեղեկատվական պատերազմ է վարում ԼՂՀ-ի և ՀՀ-ի դեմ: Այս նպատակով օգտագործում է ցանկացած կեղծիք` նպատակ ունենալով մոլորեցնել ոչ միայն սեփական ժողովրդին, այլև միջազգային հասարակությանը: Եթե հայկական կողմը արժանի պատասխան չտա, նրանք կգործեն ավելի սանձարձակ»: Այս մասին լրագրողների հետ հանդիպմանը հայտնեց գրող-հրապարակախոս Բակուր Կարապետյանը:
Նա նշեց, որ ադրբեջանական քարոզչական մեքենան Խոջալուում կրած պարտության 20-ամյակի կապակցությամբ 50 երկրներում այսօր իրականացնում է տարբեր տեսակի քարոզչություն՝ ցուցադրում են ֆիլմեր, կազմակերպում լուսանկարչական ցուցահանդեսներ, հանրահավաքներ: Հենց այսօր Ստամբուլի Թաքսիմ հրապարակում տեղի է ունենալու մեծ հանրահավաք՝ կապված Խոջալուի դեպքերի հետ:
«Ադրբեջանը փորձում է բացահայտ կեղծիքի միջոցով Խոջալուի բնակչության հետ պատահած դեպքերը բարդել հայկական կողմի վրա` ձգտելով այն հավասարեցնել 1915 թվականի Եղեռնին և Երկրորդ համաշխարհային պատերազմի ընթացքում տեղի ունեցած հրեաների Հոլոքոստին: Նրանց այդ վերաբերմունքը անարգանք է նաև 20-րդ դարի այդ ոճրագործությունների միլիոնավոր զոհերի հիշատակին»:
Բանախոսի կարծիքով՝ Բաքուն փորձում է այս կերպ քողարկել նաև Մարաղայի հայերի նկատմամբ եղեռնագործությունը: «Շուշի» հիմնադրամը այժմ պատրաստվում է դիմել միջազգային դատարան և դատի տալ ադրբեջանական իշխանություններին բացահայտ կեղծիքի և միջազգային հասարակությանը մոլորեցնելու համար, որը լուրջ հանցանք է համարվում: Նրանք պատասխանատվության պետք է ենթարկվեն Մարաղայի ոճրագործության համար:
Դեպքերի ականատես Վլադիմիր Վարդանովը խոսելով Խոջալուի դեպքերի մասին՝ նշեց, որ թուրքերը շատ լավ պատրաստված էին: «Գազազած դահիճները կենդանի մարդկանց անդամահատել են, այն էլ խարույկի վրա` չխնայելով ոչ ծերերին, ոչ կանանց, ոչ երեխաներին: Դահիճների ձեռքից փախչողներին տրորել են տանկերի և զրահամեքենաների տակ: Այդ օրը Մարաղայում խոշտանգումներով սպանել են 59 խաղաղ բնակչի»:
Վերջում Վլադիմիր Վարդանովը նշեց՝ սա մի հանցանք է, որի համար պետք է համապատասխան միջազգային ատյանները պատասխանատվության ենթարկեն ոճրագործներին:
