Գյումրիում աշխատանքային այցով գտնվելու ընթացքում ՀՀ ոստիկանապետ Վլադիմիր Գասպարյանը հարցազրույց է տվել «Գալա» հեռուստաալիքին՝ խոսելով ՀՀ ոստիկանությունում կատարվելիք բարեփոխումներից։
Անդրադառնալով համազգեստի փոփոխության հարցին՝ ոստիկանապետն ասել է. «…համազգեստի միջի պարունակությունը պետք է համահունչ լինի էն արտաքին տեսքին, որը մենք մտածում ենք, որ տարիներ շարունակ մեր իսկ անփութության պատճառով մենք խլել ենք մեր համազգեստից էն, ինչի իրավունքը մենք չունեինք»։
Ըստ ոստիկանապետի՝ հիմա «ոստիկանությունը ոստիկաններին վերադարձնելու» և ոստիկանությունը նոր որակական փոփոխությունների բերելու, ոստիկանին էապես փոխելու ժամանակն է։ Նա ասել է, որ ոստիկանը չպետք է ահ ու սարսափ լինի հասարակության համար և նշել է, որ այդ է վկայում պահպանության ծառայության նոր համազգեստի տարբերանշանի վրա առկա աղավնու պատկերը։ Ինչպես հավաստիացրել է Վ. Գասպարյանը, «աղավնին Հին Կիլիկիո սուրբ Ավետարանից վերցված սուրբ հոգու նշանն է»։
ՀՀ ոստիկանապետն անդրադարձել է նաև կադրային քաղաքականությանը՝ ասելով, որ դրա արդյունքում որոշ մարդիկ հեռացել են համակարգից. «Գնացին համակարգից մարդիկ՝ հասկանալով, որ իրենք սպառել են իրենց համակարգում և համակարգն իրենց չի ընդունում։ Նրանք, իհարկե, այդքան էլ մեծ թիվ չեն կազմում՝ շուրջ 20 հոգի էդ ահռելի համակարգում։ Իսկ կոնտինգենտը էն ոստիկաններն են, որոնք երկար տարիներ մի տեղ մնալով՝ ուղղակի որոշակի սովորույթներ են ձեռք բերել, և դա բացասական է անդրադառնում արդեն աշխատանքի վրա։ Զբոսաշրջիկներ են, որոնք համակարգում զբոսաշրջիկի կարգավիճակ ունեն»։
Գասպարյանը նաև ասել է, որ բարեփոխումների շնորհիվ ոստիկանությունը կբերվի «բացարձակ օրենքի գերիշխանության դաշտ»։ Դա դժվար ճանապարհ է, և դեռ հայտնի չէ, թե ինչով կավարտվի
Պատասխանելով «Գալա» հեռուստաընկերության լրագրողի այն հարցին, թե ճի՞շտ է արդյոք, որ ոստիկանապետը Գյումրի է այցելել ընտրություններից առաջ տեղի իրավապահներին «դուխ տալու» համար, ոստիկանապետն ասել է. «Ես հենց «դուխ» բառն էլ կօգտագործեմ։ Իհարկե՝ ոստիկանապետը եկել է «դուխ տալու» ։ Ոստիկանապետի ուղղակի պարտավորությունն է ոգևորել անձնակազմին, և խոսքով, և գործով և սեփական օրինակով ցույց տալ, թե ինչումն է բանը։ Իհարկե, ես եկել եմ ընտրությունների համար խոսամ… Իհարկե ինձ մտահոգում են ընտրությունները, և համոզված եղեք, որ մայիսին ավելի լավ ենք պատրաստված լինելու ընտրություններին։ Բոլոր պայմանավորվածությունները ձեռք ենք բերել»։
