Ջրհեղեղի հետևանքով Գերմանիայում արդեն կան զոհեր: 2010-ի վերջի առատ ձյունը, եղանակի կտրուկ տաքացումն ու անցած օրերի անձրևները հանգեցրին ձնհալի, որի հետևանքով Մոզել, Մայն և Ռեյն գետերում ջրի մակարդակը կտրուկ բարձրացավ: Ինչպես փոխանցում է Deutsche Welle-ն, արդեն կա առնվազն մեկ զոհ:
Արևմտագերմանական քաղաքները պատրաստվում են ջրհեղեղին: Նախօրեին Մոզելի շրջակա ավելի քան 30 բնակավայր տուժել է տարերքից, Կոխեմ և Ցելլ քաղաքների փողոցներում ջրի մակարդակը մոտավորապես 1,5 մետր է:
Տարերքը նախօրեին հասել է նաև Կոբլենց, որը գտնվում է Մոզելի և Ռեյնի խառնատեղում: Կեսօրին ջրի մակարդակը հասել է 8,3 մետրի: Քաղաքի գլխավոր տեսարժան վայրը` «Գերմանական անկյունը» (Deutsches Eck), որտեղ Մոզելը թափվում է Ռեյնի մեջ, ծածկվել է ավելի քան 1 մետրի հասնող ջրով. ջրի տակ տակ են հայտնվել նաև Ռեյնի առափնյա տները:
Կոբլենցում ջրի մակարդակը այս օրվա վերջին կարող է հասնել 9 մետրի: Ըստ կանխատեսումների, դրա հետևանքով ջրածածկ կլինի մեկ թաղամաս, որտեղ ապրում է 5 հազար մարդ: Հունվարի 11-ին ջրհեղեղը կհասնի Քյոլն և Դյուսելդորֆ, որտեղ նույնպես կանխատեսվում է Ռեյնի մակարդակի բարձրացում մինչև 9 մետր: