ԱԷՄԳ-ն այսօր հրապարակած զեկույցում ասել է, որ Իրանը վերջին շրջանում արագացրել է ուրանի հարստացման աշխատանքները: Նման հայտարարությունը կարող է մեծացնել Արևմուտքի անհանգստություններն Իրանի միջուկային ծրագրի վերաբերյալ:
Reuters-ը հաղորդել է, որ Ատոմային էներգետիկայի միջազգային գործակալությունն այսօր նաև զեկուցել է Թեհրանում իր ձախողված առաքելության մասին, որի նպատակն էր այնպես անել, որ Իրանը պատասխանի Թեհրանի միջուկային ծրագրի վերաբերյալ առաջացած անհանգստություններին:
Վիեննայում հիմնված ՄԱԿ-ի գործակալությունը նաև հայտնել է, որ իրենք շարունակում են կասկածներ ունենալ Իրանի միջուկային զենք ստեղծելու նկատառումների վերաբերյալ:
ԱԷՄԳ-ի զեկույցը ցույց է տվել, որ Իրանն էականորեն ավելացրել է իր աշխատանքն ուրանի հարստացման «Նաթանզ» հաստատությունում:
Հարստացված ուրանը կարող է օգտագործվել ատոմակայանների կողմից, բայց միևնույն ժամանակ այն կարող է օգտագործվել միջուկային զենք ստեղծելու համար, որը Արևմուտքի ամենամեծ անհանգստությունն է:
