Բարձրաստիճան դիվանագետն այսօր ասել է, որ այն երկրները, որոնք մտնում են «Սիրիայի բարեկամներ» խմբի մեջ, այսօր կայանալիք հանդիպման ժամանակ ՄԱԿ-ին կոչ կանեն ծրագրել Սիրիա խաղաղապահներ ուղարկելու առաքելությունն այն բանից հետո, երբ երկրի իշխանությունը կհամաձայնի դադարեցնել հարձակումները:
Ինչպես արդեն հաղորդել էինք, ԱՄՆ-ը, եվրոպական և արաբական մի շարք երկրներ այսօր պետք է հանդիպեին` պահանջելու Սիրիայի նախագահ Բաշար Ասադից համաձայնել ու անմիջապես դադարեցնել կրակը և թույլ տալ, որ մարդասիրական օգնությունը հասնի երկիր: Հակառակ դեպքում, ինչպես հաղորդում է Associated Press-ը, Սիրիայի իշխանության հանդեպ կիրականացվեն խիստ պատժամիջոցներ և անգամ զինված հարձակում:
Դիվանագետն ասել է, որ եթե Ասադն ընդունի առաջարկը, ՄԱԿ-ն այնուհետև երկիր կուղարկի խաղաղապահ ուժեր՝ Ասադի կամ նրան հաջորդող նախագահի թույլտվությամբ: Բայց, այնուամենայնիվ, ինչպես նշել է դիվանագետը, այս հանդիպումը շատ բան չի կարող փոխել, բացի նրանից, որ 70 երկրների պահանջը` արյունահեղությունը դադարեցնելու վերաբերյալ, միայն կմեծացնի Ասադի վրա ճնշումը:
