Սևծովյան տնտեսական համագործակցության խորհրդարանական վեհաժողովում հայկական պատվիրակության ղեկավար Գագիկ Մինասյանը փետրվարի 24-ին հրավիրված մամուլի ասուլիսում ներկայացրել է շաբաթվա սկզբին Ստամբուլում տեղի ունեցած քննարկումների արդյունքները:
ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ նոյեմբերին Տիրանայում ՍԾՏՀ ԽՎ 38-րդ նստաշրջանն անավարտ էր մնացել` ալբանական իշխանությունների ապակառուցողական դիրքորոշման պատճառով, ինչն էլ Ստամբուլում մեկ անգամ ևս հավաքվելու և ընթացիկ հարցեր քննարկելու, վեհաժողովի բյուջեն հաստատելու անհրաժեշտություն էր առաջացրել:
Գագիկ Մինասյանը տեղեկացրել է, որ ընթացակարգային հարցերին զուգահեռ, քննարկվել է նաև կանոնակարգում փոփոխություններ նախատեսող հարցը: Հայկական պատվիրակությունն արդեն ավելի քան երկու տարի է` փորձում է հետևողականորեն փոփոխություն կատարել հիմնական պաշտոններում ընտրվելու կարգում: Վեհաժողովին անդամակցող 12 երկրները, կախված երկրի մեծությունից, տարբեր թվակազմով են ներկայացված ԽՎ-ի պատվիրակություններում: Դրա հետևանքով քվեարկությունների ժամանակ Ռուսաստանը, Թուրքիան կամ Ուկրաինան պաշտոններ զբաղեցնելու առավել մեծ հնարավորություն են ստանում, քան փոքր երկրները:
Այս անհավասարությունը վերացնելու նպատակով հայկական պատվիրակությունը կանոնակարգը փոխելու վեց առաջարկ է ներկայացրել: Կազմակերպությանն անդամակցող խոշոր պետություններն ու մասնավորապես Թուրքիան դեմ են եղել առաջարկվող փոփոխություններին. նախորդ անգամ այդ կետերը բացասական եզրակացություն էին ստացել: Լարված քննարկումներից հետո հայկական կողմը Ստամբուլում հաջողել է ընդունելի դարձնել 6 առաջարկներից 4-ը: Մասնավորապես, վեհաժողովի նախագահի 5 տեղակալների համար սահմանվել է, որ յուրաքանչյուր երկիր կարող է մեկ տարի ժամանակով միայն զբաղեցնել այդ պաշտոնը և որ հաջորդ տարի նույն պաշտոնում պատգամավոր առաջադրելու իրավունք չի ունենա:
Հանձնաժողովի նախագահների և փոխնագահների դեպքում ևս արգելվել է անընդմեջ առաջադրումը նույն երկրի կողմից: Նմանատիպ իրավիճակ էր ստեղծվել նաև ԽՎ-ի աշխատակազմի` դիվանագիտական անձնագրեր ունեցող 8 պաշտոնյաների դեպքում, մինչդեռ Հայաստանի համար կարևոր էր Թուրքիայում ունենալ դիվանագիտական լիազորություններ ունեցող պաշտոնյա: Գագիկ Մինասյանը նշված փոփոխությունները գնահատել է մեծ ձեռքբերում` ուշագրավ համարելով, որ դրանք հաջողել են Խվ-ում Հայաստանի նախագահության պայմաններում:
Ստամբուլում քննարկումները նախագահել է ԱԺ պատգամավոր և պատվիրակության անդամ Արեգ Ղուկասյանը, ով, որպես վեհաժողովի նախագահի տեղակալ, փոխարինել է ԱԺ նախագահ Սամվել Նիկոյանին:
Մայիսին, վեհաժողովի 39-րդ լիագումար նիստում Հայաստանը նախագահությունը կփոխանցի Ադրբեջանին: Մինչ այդ մեր պատվիրակությունը կշարունակի աշխատանքները` չընդունված երկու առաջարկները ևս կանոնակարգում արտացոլելու համար:
