«Առաջին լրատվական»-ի զրուցակիցն է Հանրապետություն կուսակցության քաղխորհրդի անդամ Սուրեն Աբրահամյանը:
– Պարոն Աբրահամյան, ՀՀ նախկին արտգործնախարար Վարդան Օսկանյանի` ԲՀԿ-ին անդամակցությունից հետո Լևոն Տեր-Պետրոսյանի քաղաքագիտական վերլուծությունը շարունակո՞ւմ է ուժի մեջ մնալ, համագործակցության շփման եզրեր գտնելու հնարավորություններ դեռևս կա՞ն:
– Ինձ թվում է, որ Վարդան Օսկանյանի` Բարգավաճ Հայաստան կուսակցությանը անդամակցելու այդ քայլի հետևից ոչ միայն Ռոբերտ Քոչարյանի ականջները երևացին, այլև` ամբողջ գլուխը: Այդ առումով դժվար թե սրանից հետո Բարգավաճ Հայաստան կուսակցությունը անի այն քայլերը, ինչ որ կարելի էր ակնկալել այդ քաղաքագիտական վերլուծությամբ: Ուստի զուտ ուղիղ համագործակցություն ԲՀԿ-ի հետ այս պահին ես գոնե բացառում եմ:
– ԲՀԿ նորաթուխ ներկայացուցիչ, Հայաստանի նախկին արտգործնախարար Վարդան Օսկանյանն օրերս հայտարարել է, որ փաստացի կոալիցիա չկա, որ` «անցյալ տարվա փետրվարին ՀՀԿ կողմից ԲՀԿ-ին պարտադրված հուշագիրը այլևս ուժի մեջ չէ», և որ` կոալիցիոն կուսակցությունների միջև մրցակցություն է սպասվում: Ինչպե՞ս կգնահատեք այս հայտարարությունը:
– Անկեղծ ասած, դա ինձ բացարձակապես չի հետաքրքրում, որովհետև ես դրանց իրարից շատ չեմ տարբերում վերջին հաշվով, իսկապես ինձ դա քիչ է հուզում, թե` ո՞վ մտավ, ո՞վ դուրս եկավ և ի՞նչ հայտարարեց:
– Լավ, սոցիոլոգները արդեն իսկ սկսել են ներարկել հասարակության գիտակցության մեջ մի գաղափար` առաջիկա ընտրություններում հիմնական պայքարը ընթանալու է իշխանական երկու կուսակցությունների` ՀՀԿ-ի և ԲՀԿ-ի միջև: Դուք հավատո՞ւմ եք այդ պայքարի իրական լինելուն:
– Ես նկատելի պայքար չեմ տեսնում այդ կուսակցությունների միջև, բացի մանր-մունր, երբեմն ենթադրյալ գործողություններից` ԲՀԿ-ականներին բռնեցին-բաց թողեցին… Այդ բոլորը լուրջ չի: Առանձնապես լուրջ առճակատում ես առայժմ չեմ տեսնում:
– Պարոն Աբրահամյան, երեկ Հանրապետություն կուսակցության քաղխորհրդի տարածած հայտարարությունից տեղեկացանք, որ Հանրապետություն կուսակցությունը ՀՀ հինգերորդ գումարման Ազգային ժողովի ընտրությունները դիտարկում է որպես սահմանադրական կարգը վերականգնելու իրավական հնարավորություն, և որ կուսակցության ողջ ներուժը առաջիկա քաղաքական գործընթացներում ներգրավելով` ՀԱԿ-ի համամասնական ցուցակում ներկայացված կլինի միայն Հանրապետություն կուսակցության քաղխորհրդի նախագահ Արամ Սարգսյանը: Ի՞նչ է սա նշանակում, պարոն Աբրահամյան, Հանրապետություն կուսակցությունը Հայ ազգային կոնգրեսին մաս կազմող ազդեցիկ կուսակցություններից մեկն է, ինչո՞վ է պայմանավորված նման որոշումը:
– Մեզ համար խորհրդարան մտնելը գերխնդիր չէ, այլ միջոց է իշխանափոխություն իրականացնելու համար: Մենք երկրում ընթացող ամեն մի քաղաքական գործընթաց, լինեն արտահերթ, թե հերթական ընտրություններ, այդ կտրվածքով ենք դիտարկում և գնահատում: Եվ բացի դրանից` Հայ ազգային կոնգրեսում 18 քաղաքական կուսակցություններ կան` ամեն մեկը իր նպատակներով, իղձերով, ինչու չէ, նաև` ամբիցիաներով: Մենք մի փոքր առաջ ընկանք: Մինչև այնտեղ սկզբունքներն են քննարկում, մենք Հայ ազգային կոնգրեսում մեր վճռականությունն արտահայտում ենք առաջինը` որ մենք, վերջին հաշվով, իշխանափոխության արմատական կողմնակիցներն ենք, երկրում սահմանադրական կարգի հաստատման կողմնակիցներն ենք, մեր հիմնական խնդիրը դա է, իսկ սա ուղղակի միջանկյալ պրոցես պետք է լինի: Եվ երկրորդը` մենք երբեք մեր ամբիցիաների գերին չենք դարձել, մեծահոգաբար մեղ տեղը մյուսներին ենք զիջում և օրինակ ծառայում: