CNN Türk-ն առաջին անգամ հրապարակել է Թուրքիայի ներկայիս վարչապետ Ռեջեփ Էրդողանի բանտային երկու նկար, որոնք մինչ այդ չէին հրապարակվել: Նկարներից մեկում Էրդողանը բանտ մուտք գործելիս ողջունում է հավաքված ամբոխին, իսկ մյուս նկարում նա արդեն պատկերված է բանտախցում:
Հիշեցնենք, որ 1994-1998 թվականներին Էրդողանը եղել է Ստամբուլի քաղաքապետ, իսկ 1997 թվականի փետրվարի 28-ին Թուրքիայում իրականացվեց հետմոդեռնիստական հեղաշրջում, որի արդյունքում հրաժարական տվեց հայտնի իսլամիստ Նեջմեթթին Էրբաքանի գլխավորած կառավարությունը:
1998 թվականի փետրվարի 21-ին թուրքական դատարանը, կրոնական ու ռասիստական ատելություն բորբոքելու համար, Քրեական օրենսգրքի 312-րդ հոդվածի 2-րդ կետով Էրդողանին դատապարտեց մեկամյա բանտարկության և նշանակեց 860 միլիոն (հին) թուրքական լիրա տուգանք:
Ցույցերից մեկի ժամանակ Էրդողանն արտասանել էր. «Մինարեթները մեր սվիններն են, գմբեթները` մեր սաղավարտները, մզկիթները մեր զորանոցներն են, իսկ հավատացյալները` մեր զինվորները»:
Էրդողանի բողոքարկումներից հետո նախ այդ պատժաչափը նվազեցվեց մինչև 10 ամսվա, իսկ տուգանքը` մոտ 177 միլիոնի, ապա Թուրքիայի Վճռաբեկ դատարանը 1998 թվականի սեպտեմբերի 24-ին վճռեց, որ Էրդողանը բանտում պետք է անցկացնի 4 ամիս:
Էրդողանը բանտից, ուր հայտնվել էր մարտի 26-ին, դուրս եկավ 1999 թվականի հուլիսի 24-ին:
