ՀՀ-ում ԱՄՆ արտակարգ և լիազոր դեսպան Ջոն Հեֆերնը իր տեսաբլոգի 12-րդ թողարկման մեջ խոսել է հայ-ամերիկյան հարաբերությունների 20-ամյակի մասին:
Տեսաբլոգում դեպանը մասնավորապես ասում է, որ 20 տարի առաջ` Հայաստանի անկախացումից քիչ անց` փետրվարին, իր դռները բացեց Հայաստանում ԱՄՆ դեսպանությունը, և այդ ժամանակից ի վեր Միացյալ Նահանգների ու Հայաստանի միջև «հարաբերություններն ամուր են ու ավելի են ամրապնդվում»:
« Երկխոսությունների նման բարձր մակարդակ, այդ թվում` նախագահ Օբամայի և նախագահ Սարգսյանի միջև, երբևէ չի եղել: 2010 թ. ԱՄՆ պետքարտուղար Քլինթոնի այցը Հայաստան փաստում է մեր ամուր բարեկամությունն ու նվիրումը»,- ասում է Հայաստանում ԱՄՆ արտակարգ և լիազոր դեսպանը:
Անդրադառնալով 2011 թվականին` դեսպանն ընդգծում է, որ բարձրաստիճան այցերի մակարդակը պահպանվել է, ինչի վկայությունն են ամերիկացի պաշտոնյաների հանդիպումները Հայաստանի պետական այրերի, ընդդիմադիր ու իշխող կուսակցության ներկայացուցիչների, խորհրդարանականների ու գործարարների հետ:
«Մեր հարաբերությունները խորն են ու համընդգրկուն: ԱՄՆ կառավարության փոխանակման ծրագրերով Հայաստանից Միացյալ Նահանգներ է այցելել ավելի քան 3500 մասնակից: Զարգացմանն ուղղված մեր օժանդակությունն ու համագործակցությունը տարիների ընթացքում կազմել է 2 մլրդ դոլար»,- ասել է Ջոն Հեֆերնը` հավելելով, որ Հայաստանն ու ԱՄՆ-ն ներկայումս համատեղ աշխատում են ընդհանուր նպատակների իրականացման ուղղությամբ:
Ըստ դեսպանի` դրանք են ժողովրդավարությունը, բարեկեցությունը, անվտանգությունն ու խաղաղությունը Հայաստանում և տարածաշրջանում:
