ԱՄՆ նախագահ Բարաք Օբաման որոշում է ընդունել երկարացնել Լիբիայի դեմ կիրառվող պատժամիջոցները ևս մեկ տարով: Այս մասին հաղորդում է Interfax-ը՝ վկայակոչելով Սպիտակ տան մամուլի ծառայության հայտարարությունը:
Կոնգրեսին ուղղված նամակում Օբաման բացատրել է, որ իրեն անհանգստացնում են Լիբիայում ԱՄՆ շահերը, քանի որ Լիբիայի նախկին առաջնորդ Մուամար Քադաֆիի ընտանիքի անդամները դեռ վտանգ են ներկայացնում:
«Մենք Լիբիայի դեմ պատժամիջոցները թուլացնելու գործընթաց ենք վարում, քանի որ դրական փոփոխություններ ենք նկատում երկրում, ներառյալ Քադաֆիի վարչակարգի տապալումը: Սակայն Լիբիայում տիրող իրավիճակը դեռևս շարունակում է վտանգ ներկայացնել ազգային անվտանգությանը և ԱՄՆ արտաքին քաղաքականությանը»,- ասվում է նախագահի նամակում:
Անցյալ տարվա դեկտեմբերին Մուամար Քադաֆիի վարչակարգի տապալումից հետո ԱՄՆ-ը և ՄԱԿ-ը հանեցին Լիբիայի վրա սահմանված պատժամիջոցների մեծ մասը: Այդ ժամանակ ԱՄՆ գանձարանն ապասառեցրեց լիբիական հաշիվներից ավելի քան 30 մլրդ դոլար:
