Հունվարի 9-ը 20-րդ դարի խոշորագույն կինոռեժիսոր, Հայաստանի և Ուկրաինայի ժողովրդական արտիստ Սերգեյ Փարաջանովի ծննդյան օրն է: Փարաջանովը ծնվել է 1924թ. Թիֆլիսում: 1946թ. սովորել է կինեմատոգրաֆիստների պետական ինստիտուտում: Փարաջանովի գլուխգործոցը «Նռան գույնը» կամ «Սայաթ-Նովա» (1968) ֆիլմն է, որով նրան շատերը ճանաչեցին: «Նռան գույն» կինոնկարը պատմում է թիֆլիսահայ աշուղ Սայաթ-Նովայի կյանքի մասին` կոլորիտային Կովկասի ֆոնին: Ֆիլմը ենթարկվել է խորհրդային գրաքննության: Ֆիլմից հետո Փարաջանովին իր ժամանակակիցները չհասկացան, կառավարությունը նրա հանդեպ հատուկ վերաբերմունք որդեգրեց և 1973թ. դեկտեմբերի 17-ին 5 տարի ազատազրկմամբ բանտարկեց` մեղադրելով արվամոլության մեջ: Փարաջանովի ազատազրկմանը արձագանքեցին բազմաթիվ հայտնի մարդիկ, սակայն նրան ազատեցին միայն 4 տարի անց` ֆրանսիացի սյուրռեալիստ Լուի Արագոնի միջամտությամբ:
Թիֆլիսում ապրելու ժամանակ երկար տարիներ նրան արգելեցին ֆիլմեր նկարահանել, սակայն 80-ականներին թույլատրեցին նկարել «Սուրամի ամրոցի լեգենդը» (1984), «Աշուղ Ղարիբը» ֆիլմերը: Կյանքի վերջին տարիներին Փարաջանովը սկսեց նկարել ինքնակենսագրական «Խոստովանանք» ֆիլմը, որը սակայն անավարտ մնաց: Հետագայում այն ամբողջությամբ օգտագործվեց Միքայել Վարդանովի «Փարաջանով: Վերջին գարուն» վավերագրական ֆիլմում:
