Ըստ Ժողովրդական կուսակցության նախագահ Տիգրան Կարապետյանի` այսօր քաղաքական դաշտում գործող առողջ ուժերն են ՀԱԿ-ը և «Սարդարապատ» շարժումը: Կարապետյանը կոչ արեց այդ ուժերին միանալ իրենց պայքարին ընդդեմ անարդարության:
«Սարդարապատ» շարժման նախաձեռնող խմբի անդամ Ժիրայր Սեֆիլյանը, անդրադառնալով Կարապետյանի կոչին, «Առաջին լրատվականին» ասաց. ««Սարդարապատ» շարժմանը հետաքրքրում են այն բոլոր օջախները, որոնք պատրաստ են դիմադրելու այս կեղեքող համակարգին, ուստի մենք պատրաստ ենք որևէ դիմադրող օղակի հետ համագործակցել, եթե նրանք իրոք դիմադրող են»:
Հարցին, թե արդյոք Ժողովրդական կուսակցությունը իրոք դիմադրող ուժ է, Սեֆիլյանը պատասխանեց. «Ժամանակ է պետք, որ դա ավելի հստակվի: Արդարության վերականգնման համատեքստում կա ԱԼՄ-ի փակվելը, բայց մեզ միայն դա չի բավարարում, քանզի մի կողմից ընդունել, որ այսօր մեր երկրում կա նախագահ, որի անունն է Սերժ Սարգսյան, մյուս կողմից էլ` լինել ընդդիմադիր, ես դա չեմ հասկանում»:
Սեֆիլյանի խոսքերով, ընդդիմություն չի կարելի կոչել որևէ մի քաղաքական գործչի. «Ընդդիմությունը մեր ժողովուրդն է, այստեղ խնդիրը ժողովրդին կազմակերպելու անկեղծ մղման մեջ է. ով ուզում է լինի ճիշտ կազմակերպողը, «Սարդարապատը» նրանց միայն կխրախուսի»: