Այսօր կառավարության նիստում հավանություն տրվեց «Արտակարգ դրության իրավական ռեժիմի մասին» և «Վարչական իրավախախտումների վերաբերյալ ՀՀ օրենսգրքում լրացում կատարելու մասին» ՀՀ օրենքների նախագծերին, որոնք համարվեցին անհետաձգելի և կներկայացվեն ԱԺ:
Արդարադատության նախարար Հրայր Թովմասյանը ասաց, որ անցած նստաշրջանում ԱԺ-ում մի շարք հարցեր էին առաջացել, այդ թվում` արդյոք զինված ուժերը պատրաստվա՞ծ են արտակարգ դրության իրավիճակին: Առաջարկվել է, որ զինված ուժերը որոշ ժամանակ ՆԳՆ զորքերին հատուկ պատրաստվածություն անցնեն, գրեթե պետք է բացառվի անմիջապես բնակչության հետ նրանց շփումը: Արտակարգ դրության ժամանակ զինված ուժերը կարող են ներգրավվել միայն այն դեպքում, եթե այդ խնդիրները հնարավոր չէ լուծել ոստիկանության և ազգային անվտանգության պետական լիազոր մարմինների ուժերով։
«Նախագծով մի քանի զսպաշապիկներ են սահմանվում զինված ուժերի և բնակչության շփումը կանխելու համար, և հիմնական մտահոգությունները, որ կային, հանվել են: Կատարվել են նաև այլ փոփոխություններ, որոնք սկզբունքային բնույթ են կրել: Փաթեթը ետ է կանչվել, և այժմ ԱԺ-ում մեկ անգամ ևս լիարժեքորեն կներկայացվի»,- ասաց Հ. Թովմասյանը:
Նախագծով սահմանվել է, որ արտակարգ դրությունը ժամանակավոր բնույթ կրող ռեժիմ է, և Հայաստանի ամբողջ տարածքում հայտարարվող արտակարգ դրության ժամկետը չի կարող գերազանցել 30 օրը, իսկ հանրապետության առանձին տարածքներում` 60 օրը: