Մեծ Բրիտանիայի ԱԳՆ ղեկավար Ուիլյամ Հեյգն իր ցավակցությունն է հայտնել Սիրիայում զոհված լրագրողների` Sunday Times թերթի թղթակից Մարի Քոլվինի և ֆրանսիացի ֆոտոլրագրող Ռեմի Օշլիկի հարազատներին:
Այսօր Ֆրանսիայի ԱԳՆ–ը հաստատել է սիրիական Հոմս քաղաքում ֆրանսիացի ֆոտոլրագրող Օշլիկի և ամերիկուհի Քոլվինի մահը, ով ավելի քան 30 տարի որպես թղթակից աշխատել է Sunday Times բրիտանական հրատարակչությունում: Նա մի քանի տասնամյակ լուսաբանում էր ամբողջ աշխարհում, ներառյալ՝ Չեչնիայում, տեղի ունեցող ամենաբարդ հակամարտությունները, իսկ 2001 թվականին վիրավորվել էր Շրի-Լանկայում, որից հետո զրկվել էր աչքից:
«Սա հերթական անգամ հիշեցում է Սիրիայում մարդկանց տառապանքների, ամեն օր տասնյակ մարդկանց զոհվելու մասին»,- հայտարարել է Հեյգը: Միաժամանակ նա հավելել է, որ լրագրողները զոհվել են իրենց մասնագիտական պատքն «անվախորեն» կատարելով:
Նախարարը նշել է նաև Քոլվինի արժանիքները, ում Մեծ Բրիտանիայում բոլորը գիտեին և սիրում էին:
«Շատ տարիներ նա պատմել է այնպիսի բաներ, ինչպիսիք ոչ ոք չի պատմել` աշխատելով ամենավտանգավոր իրավիճակներում: Նա իր աշխատանքի նվիրյալն էր, բոլորի կողմից սիրված և հարգված: Նրա մահը հերթական հիշեցումն է այն մասին, թե որքան վտանգավոր է ճշմարտությունը պատմող լրագրողի աշխատանքը»,- հավելել է Հեյգը:
Բրիտանիայի ԱԳՆ–ը միջազգային հանրության ուշադրությունը հրավիրում է այն բանի վրա, որ լրագրողների մահը նախագահ Բաշար Ասադի վարչակարգը «ջանքերը կրկնապատկելով» տապալելու հերթական ազդանշանն է:
