«ՏՀՏ լիդերների հանդիպում» ֆորումի ընթացքում, որն այս անգամ տեղի կունենա փետրվարի 25-26-ը՝ Աղվերանում, կքննարկվեն Հայաստանում հեռահաղորդակցության ոլորտի զարգացման ռազմավարությունը և առկա խնդիրները:
Ֆորումին կմասնակցեն ներկայացուցիչներ ՀՀ Էկոնոմիկայի, Տրանսպորտի և Կապի, ՀՀ Տարածքային կառավարման, ՀՀ Քաղաքաշինության, Ֆինանսների նախարարություններից, ՀՀ Տնտեսական մրցակցության պաշտպանության պետական հանձնաժողովից, ՀՀ Հանրային ծառայությունները կարգավորող հանձնաժողովից, Երևանի քաղաքապետարանից, ՀՀ ԿԱ Անշարժ գույքի կադաստրի պետական կոմիտեից, ինչպես նաև տեղեկատվական և հեռահաղորդակցության ոլորտներում գործող ընկերություններից:
Հանդիպում-ֆորումի օրակարգում ներառված են ՀՀ հեռահաղորդակցության ոլորտի զարգացման ռազմավարությունը, խնդիրները և հնարավորությունները, հեռահաղորդակցության ոլորտի հանրային ծառայությունների կարգավորման խնդիրները և միջնաժամկետ նպատակները, ենթակառուցվածքների համատեղ օգտագործում` վիրտուալ օպերատորներ, համարների տեղափոխելիություն, ունիվերսալ ծառայություններ, հեռահաղորդակցության ենթակառուցվածքների զարգացման հնարավորությունները՝ մայրուղիներից մինչև տանիքներ, հեռահաղորդակցության ոլորտի տենդերները, ոլորտային միությունների ներկայացուցիչների ներգրավման հնարավորությունները և այլն:
ԻՏՁՄ-ից հայտնեցին, որ քննարկված հարցերի և ձևավորված առաջարկությունների վերաբերյալ առաջարկները կփոխանցվեն ՀՀ կառավարություն և լիազոր մարմիններ:
