Մոսկվայում հայազգի գործարար Սամվել Կարապետյանին պատկանող «Տաշիր» ընկերությունների խումբը պատրաստվում է 500 մլն եվրոյով ձեռք բերել իտալական հանրահայտ Roberto Cavalli նորաձևության տունը:
Ինչպես հաղորդում են ռուսական լրատվամիջոցները՝ վկայակոչելով՝ իտալական է Il Sole 24 Ore բիզնես թերթը, նոր գործարքն, ամենայն հավանականությամբ, կապված է «Տաշիր» ընկերությունների խմբի կողմից արդեն գործարկված Casa Italia կոչվող նախագծի հետ, որը զբաղվում է Մոսկվայում իտալական խանութներ բացելու գործով:
Ինքը՝ Ռոբերտո Կավալին, իր բիզնեսը գնահատում է ոչ պակաս, քան 1 մլրդ եվրո: Մասնագետները կարծում են, որ իրականում այն արժե 500 մլն եվրո:
Այժմ նորաձևության տունը պատկանում է Erreci հոլդինգին: 2010 թ. վերջին Cavalli-ի վաճառքի ծավալը գերազանցել է 170 մլն եվրոն, իսկ մաքուր եկամուտը կազմել է 25 մլն եվրո:
Կավալին 2009 թ. արդեն մեկ անգամ փորձել է վաճառել իր բիզնեսի մի մասը, սակայն գործարքը տապալվել է: Բացի այդ, իտալացի մագնատը ուսումնասիրում է այլ ներդրողների առաջարկություններ:
«Առայժմ մենք ոչ մի մեկնաբանություն չենք տալիս այդ հարցով»,- Life New-ին ասել է «Տաշիր»-ի մարկետինգի տնօրեն Օլգա Իգնատովան:
Նորաձևության տան պաշտոնական հաղորդագրության համաձայն՝ ընկերությունն ամբողջությամբ հերքում է «Տաշիր» ընկերությունների խմբի հետ բանակցություններ վարելու շուրջ լուրերը:
Cavalli ապրանքանիշը հիմնվել է 1960 թ.:
