Քրեակատարողական հիմնարկներում պետք է հստակ կանոնակարգված մեխանիզմ լինի: Այս մասին «Առաջին լրատվական»-ի հետ զրույցում հայտնեց Քրեակատարողական հիմնարկներում դիտորդություն իրականացնող խմբի անդամ Ռոբերտ Ռևազյանը`խոսելով քրեակատարողական հիմնարկներում գրանցված Հովհաննես Դոխոլյանի ինքնասպանության և նման դեպքերից խուսափելու երաշխիքների շուրջ:
Նրա համոզմամբ` պարզապես պետք է հստակ կանոնակարգված մեխանիզմ լինի, թե ինչպես պետք է արդեն իսկ պատժաչափը կրելուն խոչընդոտող հիվանդության դեպքում դատապարտյալը կրի պատիժը, և ինչպես նրան կարող են ազատ արձակել այդ հիմքով: «Դեռևս այդ ամենը հստակ կանոնակարգված չէ, և մասնավորապես դա կանոնակարգված չէ ժամկետների առումով: Հիմա դիտորդական խումբը խնդրի կարգավորման վերաբերյալ առաջարկություններ է ներկայացնում, ահազանգում է, որ այդպիսի խնդիր կա: Այլ իրավասություններ դիտորդական խումբը չունի»,- նշեց Ռ. Ռևազյանը`հավելելով, որ դիտորդական խումբը նաև դատապարտյալների պայմանների վերաբերյալ ուսումնասիրություններ է իրականացնում:
Հիշեցնենք, որ փետրվարի 20-ին ՀՀ արդարադատության նախարարության տեղեկատվական կենտրոնից հայտնել են, որ փետրվարի 18-ին, ժամը 05:00-ի սահմաններում մահացել է ՀՀ ԱՆ «Դատապարտյալների հիվանդանոց» քրեակատարողական հիմնարկում գտնվող 1960 թ. ծնված դատապարտյալ Հովհաննես Դոխոլյանը: Ըստ նախնական վարկածի, Դոխոլյանը հոսանքահարվելով ինքնասպան է եղել, իսկ մինչ ինքնասպան լինելը թողել է գրություն, հայտնելով, որ ինքը զզվել է ապրելուց: Հ. Դոխոլյանի առողջական վիճակի վերաբերյալ դիտորդների խումբը երեք հրատապ հաշվետվություն է ներկայացրել ՀՀ արդարադատության նախարարություն (2011 թ. հունիսի 9-ին, հուլիսի 22-ին և դեկտեմբերի 22-ին), հայտնելով, որ նա տառապում է պատիժը կրելուն խոչընդոտող ծանր հիվանդություններով: Սակայն առնվազն 7 ամիս հարցին լուծում չի տրվել:
