Ադրբեջանական Turan լրատվական գործակալության փոխանցմամբ՝ Amnesty International (AI) միջազգային իրավապաշտպան կազմակերպությունը հրապարակել է Ադրբեջանում մարդու իրավունքների խախտումների մասին զեկույց՝ նկատի ունենալով առաջիկայում այդ երկրում կայանալիք «Եվրատեսիլ 2012» երաժշտական մրցույթի անցկացումը:
AI-ի զեկույցում նշված է. «Ադրբեջանը միլիոնավոր դոլարներ է վատնում իր PR կամպանիայի վրա՝ փորձելով ստեղծել ժամանակակից ու առաջադեմ երկրի կերպար: Սակայն անկախության 20 տարիներին նրան չհաջողվեց իրագործել իր քաղաքացիների համար հիմնական ազատությունները, ինչն Ալիևի նախագահության ժամանակ առավել անտեսվեց արտաքին աշխարհի կողմից:
Ադրբեջանում նախագահին ու կառավարության ազդեցիկ գործիչներին քննադատողները հաճախ են պատժվել: Այդ ամենի վրա աչք է փակում միջազգային հանրությունը, ում աչքերը թվում է, թե ավելի շատ ուղղված են նավթադոլարների ու էներգետիկ անվտանգության վրա, քան հասարակ ադրբեջանցիների իրավունքների վրա:
Հակակառավարական խաղաղ ցույցերն ավարտվել են քրեական պատասխանատվությամբ, բանտերում հայտնվել են այդ ակցիաների մասնակիցները: Ոստիկանությունը չափից ավելի ուժ է գործադրել խաղաղ և պաշտոնապես չարտոնված ցույցերի ցրման ժամանակ: Մարդու իրավունքների մասին ազդարարողների նկատմամբ հնչում են սպառնալիքներ, նրանց ահաբեկում են վարչական միջոցներով:
Լրագրողներին ծեծում են, դաժան վերաբերմունք են ցույց տալիս նրանց նկատմամբ, առևանգում են: Համացանցն ու սոցցանցերը գտնվում են պաշարման մեջ: Բլոգերներն ու երիտասարդ ակտիվիստները ենթարկվում են հետապնդումների ու կեղծ մեղադրանքներով հայտնվում են բանտերում: Ներկայումս կառավարությունը դիտարկում է համացանցի օգտագործման վերահսկման ու մոնիթորինգի հնարավորությունը:
Նախորդ տարվա մարտ-ապրիլյան ցույցերից հետո Ադրբեջանում դատապարտվեց 14 մարդ: Ներկայումս Ադրբեջանում առկա է 16 «խղճի բանտարկյալ», որոնք բանտում են հայտնվել գարնանային ակցիաներից հետո: Անկախ և ընդդիմադիր լրագրողները բողոքի ակցիաների ժամանակ բախվում են աճող բռնությունների և չեն կարողանում կատարել իրենց աշխատանքը: Ցայժմ որևէ արդյունավետ հետաքննություն չի անցկացվել, և ոչ ոք պատասխանատվության չի ենթարկվել լրագրողների նկատմամբ հարձակում գործելու համար:
Մարդու իրավունքների ու ժողովրդավարական բարեփոխումների ոլորտում գործող հասարակական կազմակերպությունները բախվում են ճնշումների ու հալածանքների: Հաճախ նրանց հրաժարվում են գրանցել կամ էլ ապօրինաբար փակել են տալիս: Մարտի 7-ին և 10-ին Բաքվում փակվեցին համապատասխանաբար Ազգային ժողովրդավարական ինստիտուտի ներկայացուցչությունն ու Մարդու իրավունքների տունը: Օգոստոսի 11-ին Բաքվում ավերվեց Խաղաղության ու ժողովրդավարության ինստիտուտի շենքը:
Դա տեղի ունեցավ այն բանից հետո, երբ նա քննադատեց Ադրբեջանի կառավարությանը Բաքվի կենտրոնից մարդկանց հարկադիր վերաբնակեցման համար: Ադրբեջանում մտահոգության տեղիք են տալիս նաև կտտանքներն ու դաժան վերաբերմունքը: Նախորդ տարվա գարնանային ակցիաներից հետո ձերբակալվածները հայտնեցին, որ ձերբակալության ժամանակ ոստիկանությունը դաժանորեն է վերաբերվել իրենց հետ: Չնայած դրան՝ ցայժմ այդ մեղադրանքներից և ոչ մեկի գործով հետաքննություն չի անցկացվել»: