Լիբիական հեռուստահաղորդավար Գալյա Ալ-Միսրատին հերքել է իր սպանության մասին լուրերն` անձամբ հայտնվելով համացանցում: Այս մասին հաղորդում է ИТАР-ТАСС-ը: Հիշեցնենք, որ Ալ-Միսրատին ոչ միայն հեռուստահաղորդավարուհի էր, այլ նաև Ջամահիրի տապալված ռեժիմի «խոսափողը», ինչպես նաև՝ Մուամար Քադաֆիի սիրելի հաղորդավարուհին:
Հիշեցնենք, որ նախօրեին Al Arabiya հեռուստաալիքը հաղորդել էր, որ փետրվարի 17-ին` լիբիական ապստամբության առաջին տարելիցի օրը Ալ-Միսրատին բանտախցում հայտնաբերվել է մահացած: Ազգային անցումային խորհրդում այս տեղեկությունը ոչ մի կերպ չէին մեկնաբանել:
Սակայն արդեն երեկոյան համաշխարհային ցանցում հայտնվեց տեսահոլովակ, որտեղ Միսրատին, նշելով ամսաթիվը`19 փետրվարի 2012 թվական, հայտարարեց, որ ինքը ողջ և առողջ է: Վերջին 6 ամիսների ընթացքում նա գտնվել է «հեղափոխականների»ձեռքում, որոնք «իր հետ քրոջ պես են վարվել»:
Ժամանակին հաղորդավարուհին Libya TV պետական հեռուստաընկերության դեմքն էր, իսկ անցած տարվա օգոստոսին նրան լսեց նաև ողջ աշխարհը: Երբ գրոհում էին Լիբիայի մայրաքաղաքը, նա հեռուստաեթեր դուրս եկավ ատրճանակը ձեռքին և զենքով սպառնալով հայտարարեց, որ ինքը և իր գործընկերները կպայքարեն զավթիչների դեմ մինչև հաղթանակ, մինչև թշնամուն ջախջախելը. իրենք կմեռնեն, սակայն հեռուստաալիքը չեն հանձնի թշնամուն: Դա պետական հեռուստաալիքի վերջին եթերներից մեկն էր. այն Տրիպոլիի անկումից հետո լռեց: Այդ դեպքից որոշ ժամանակ անց աղջիկը ձերբակալվեց:
Այժմ նա հեռուստախցիկի առջև հայտնվել է ոչ թե զենքը ձեռքին, այլ ոտքից գլուխ սև, երկար իսլամական հագուստով, անվճռական։ Այս մասին հայտնում է ИТАР-ТАСС-ը: Սպառնալիքների փոխարեն այս անգամ նա շնորհավորել է լիբիական ապստամբության մեկամյա տարելիցը, որի դեմ այդքան ակտիվ հանդես էր եկել: