Արամի փողոցի նախկին բնակիչների դիմումի համաձայն հարուցված քրեական գործի քննությունը տեղից չի շարժվում: Այս մասին «Առաջին լրատվական»-ին տեղեկացրեց Արամի 72-80 շենքի բնակիչ Սոնա Մաղաքյանը: Նա նշեց, որ ՀՔԾ-ն վերածվել է հաշվապահության, քանի որ գործը հարուցվել է դեկտեմբեր ամսին, բայց հարցաքննվել են միայն բնակիչները:
«Հարցաքննում են միայն, թե ով, երբ ինչքան գումար է տվել բնակարան ձեռք բերելու համար, իսկ շատ մանրամասների անդրադարձ չի կատարվում»,- նշեց Ս. Մաղաքյանը`հավելելով, որ գործը հարուցվել է Գագիկ Պապոյանի դեմ, բայց նրանք պայմանագիր են կնքել «ԳաբՇին» ընկերության հետ: Ըստ Ս. Մաղաքյանի` այս գործում մեղավորները շատ ավելի շատ են, քան միայն Գագիկ Պապոյանը:
Հիշեցնենք, որ 2006 թվականից հանրային գերակա շահ անվան տակ քանդվեցին կենտրոնական մի շարք փողոցների բնակիչների տներ, հետագայում փոխհատուցելու նպատակով: Այդ շենքերի տեղում պետք է կառուցվեին բարձրահարկ շենքեր: Ս. Մաղաքյանի հաղորդմամբ` բարձրահարկ շենքը դեռ ավարտուն վիճակում չէ, իսկ բնակարանները բազմակի վաճառված են: Այս պահին կենտրոնական փողոցների քանդված տների բնակիչներն անօթևան են: Նրանց մինչ այսօր փոխհատուցում չեն տրամադրել: Տարեսկզբին նրանք նստացույց և ակցիաներ կազմակերպեցին ՀՀ նախագահի նստավայրի մոտ, դիմումներ և նամակներ հղեցին նրան, սակայն դեռևս անարդյունք:
