Թուրքական Hürriyet թերթի փոխանցմամբ՝ Թուրքիայի նախագահ Աբդուլլահ Գյուլին անմիջականորեն ենթարկվող Պետական վերահսկիչ պալատը (DDK) ավարտին է հասցրել Ստամբուլի հայկական «Ակօս» շաբաթաթերթի հիմնադիր-խմբագրապետ Հրանտ Դինքի սպանության գործով մոտ մեկ տարի առաջ սկսած հետաքննչական աշխատանքները: Այս մասին նշված է նախագահի ինտերնետային կայքում:
Այդ նպատակով DDK-ն պատրաստել է 653 էջանոց զեկույց, որում նշված է, որ անվտանգության ծառայություններն ու Ժանդարմերիան նախապես իմացել են Դինքին սպառնացող վտանգի մասին, սակայն քայլեր չեն ձեռնարկել դա կանխելու ուղղությամբ և չեն համագործակցել Դինքի կյանքը պահպանելու հարցում: Բացի այդ, նշված է որ Դինքի սպանության հետաքննման ժամանակ եղել են թերացումներ, և որ դրանք իրականացրած պաշտոնյաները պետք է դատվեն առաջին ատյանի դատարանում:
Հիշեցնենք, որ նախորդ տարվա հունվարի վերջերին Աբդուլլահ Գյուլը DDK-ին հրահանգել էր մանրակրկիտ ուսումնասիրել Դինքի սպանության գործն ու 4 տարի ընթացող դատավարությունը: Դրանից օրեր առաջ էլ Գյուլը հայտարարել էր, որ ամոթ է ապրել, երբ Մարդու իրավունքների եվրոպական դատարանը (ՄԻԵԴ) Թուրքիայի իշխանություններին դատապարտել է Դինքի սպանության կանխման հարցում և անցկացվող դատավարության ժամանակ հանցավոր անտարբերություն ցուցաբերելու համար:
