«Մենք ենք այս քաղաքի տերը» նախաձեռնությունն ու Մաշտոցի այգուն կից բնակվող քաղաքացիներն այսօր հաղորդագրություն են տարածել, որտեղ նկարագրված է այն ամենը, ինչ վերջին երկու տարում արել են քաղաքացիական նախաձեռնությունները` ուղղված այգու վերակենդանացմանը:
Ստորև ներկայացնենք հաղորդագրությունը.
«2010թ. Երևանի քաղաքապետարանը Տաշիր գրուպի հետ միասին ցանկանում էր կառուցապատել այգու վերին հատվածը հսկայական առևտրի կենտրոնով.
բնակիչների և քաղաքացիական նախաձեռնության ստորագրահավաքի, ինչպես նաև այլ բողոքի այլ միջոցառումների արդյունքում այդ ծրագիրը կասեցվեց:
2010թ. նախաձեռնությունը ծառատունկ տոն կազմակերպեց` այգու ծառերին ամրացնելով կանաչ ժապավեններ, որոնց վրա գրված էին հանրահայտ հայերի անուններ, և ահազանգելով այգուն սպառնացող կառուցապատման մասին, 2011թ. նախաձեռնության անդամները սեփական ջանքերով մաքրման աշխատանքներ և ծառատունկեր են կազմակերպել այգու` Մաշտոցի պողոտայի երկու կողմերում գտնվող հատվածներում: Ծառերը մինչ օրս ջրվում են բնակիչների կողմից»,- նշված է հաղորդագրության մեջ:
Վերջին երկու տարիների ընթացքում «Վերակենդանացնենք Մաշտոցի այգին» նախաձեռնության շնորհիվ քաղաքացիների ջանքերով կազմակերպվել են տասնյակ միջոցառումներ երեխաների համար, նկարչական և զվարճալի երեկոներ, թեյախմություններ, երաժշտական միջոցառումներ:
