Մաշտոցի այգու պահպանման համար պայքարողները ջանք չեն խնայում նաև ոչ աշխատանքային օրերին: Ակտիվիստներն այսօր Բարեկենդանի տոնին նվիրված երթ են անցկացրել` կոչերով, որ այգին մնա այգի, ոչ թե վերածվի առևտրի կենտրոնի:
Այս պահին պուրակ են այցելում մտավորականներ, երգիչներ: Այսօր այգու ակտիվիստներին է միացել դերասան Աշոտ Ադամյանը: Նա ուրախալի է համարել, որ կան ազնիվ երիտասարդներ, որոնք պահանջատեր են իրենց իրավունքներին: Այսօր այգում են եղել դերասաններ Հովոն, Հայկոն, ԱԺ «Ժառանգության» պատգամավոր Անահիտ Բախշյանը: Քիչ առաջ ակտիվիստներին է միացել նաև հաղորդավար Նվեր Մնացականյանը:
«Մեր քաղաքը» նախաձեռնության անդամ Արմո Սաֆարյանը Մաշտոցի պուրակից «Առաջին լրատվական»-ի հետ զրույցում ասաց, որ ակտիվիստները սպասում են նաև Հրանտ Թոխատյանին, Ռուբեն Հախվերդյանին, Լալա Մնացականյանին, Միքայել Պողոսյանին, այլոց:
«Մեր շարքերը գնալով ընդլայնվում են: Ոստիկաններն արդեն երրորդ օրն է` ամբողջությամբ շրջափակել են տարածքը, շինարարությունը շարունակվում է` չափազանցված արագ տեմպերով, նախկինում այս արագությամբ չէին աշխատում»,- նշեց նա:
«Ես բոլոր բնապահպաններին ընդունել եմ, անձամբ լսել եմ, բոլորով քննարկել ենք այս հարցը, բայց իրենք չեն ընդունում այդ պայմանները, չեն ընդունում, որ այնտեղ կանաչ գոտի չէ: Կրպակները տեղադրվում են այգու պարսպապատ տարածքներում և ոչ մի ծառ չի հատվում», – երեկ հավաստիացրել էր քաղաքապետ Տարոն Մարգարյանը: Ի պատասխան քաղաքապետի հայտնածի՝ ակտիվիստ Արմո Սաֆարյանն ասաց. «Ծառ չհատելը մի քիչ հարաբերական է, որովհետև երբ օրենքը խախտելով՝ ծառը շրջափակում ես բետոնով, ծառը երկար չի կարող դիմանալ, ընդ որում, շինարարական նորմերով՝ ծառը պետք է լինի հինգ մետր հեռավորության վրա, իսկ հենց այժմ ինձ մոտ գտնվող ծառը շինարարությունից հեռու է երևի կես մետրով»:
Ինչպես արդեն տեղեկացրել էինք, վաղը ակցիայի մասնակիցները ցույց են կազմակերպելու Երևանի քաղաքապետարանի դիմաց: «Եթե Մուհամեդը չի գալիս սարի մոտ, սարը, որը հասարակությունն է, գնում է Մուհամեդի մոտ: Փաստացի կան մի շարք օրենքների խախտումներ: Պահանջելու ենք քաղաքապետի հետ հանդիպում և պատրաստվում ենք օրենքների խախտումները գրավոր տեսքով հանձնել իրեն»,- հայտնեց Ա. Սաֆարյանը:
