Մի ամերիակցի eBay-ում գտել է փակ սեյֆ, որի մեջ ավելի ուշ հայտնաբերվել է 26 հազար դոլար կանխիկ գումար:
Թենես նահանգի Բարտլետի բնակիչ Ջեյմս Լաբրեկը, որը սեյֆը վաճառել է 122 դոլար և 93 ցենտով, հայտարարել է, թե ինքն իրեն զգում է ինչպես «ամենահիմար մարդն աշխարհում»,- տեղեկացնում է WMC-TV-ն:
Լաբրեկի խոսքերով՝ մինչ սեյֆը վաճառքի հանելը այն թափ է տվել և չի լսել որևէ ձայն, որն իրեն կհուշեր, թե այնտեղ ինչ-որ բան կա. «Ես կարծում էի, թե սեյֆը դատարկ է»,- խոստովանել է eBay-ում ապրանքի վաճառքի 15 տարվա փորձ ունեցող ամերիկացին:
Լաբրեկը պատմել է, որ այդ 26 հազարի մասին իրեն տեղեկացրել է հենց գնորդը: Իսկ երբ վաճառողը գնորդին խնդրել է կիսվել «գանձով», վերջինս մերժել է:
Մեկնաբանելով այս իրավիճակը` սեյֆ վաճառողը հայտարարել է, որ ինքը, այնուամենայնիվ, անարդար է համարում, որ գնորդը չի համաձայնել կիսվել գումարով. «Եթե ես հայտնվեի նման իրավիճակում, սեյֆ գնեի ու այնտեղից գումար գտնեի, ապա վաճառողին կասեի. «Լսիր, ընկերս, ես գումար եմ գտել և կեսը կտամ քեզ»,- հայտարարել է Լաբրեկը:
26 հազար դոլար պարունակությամբ սեյֆի գնորդը լրագրողների հետ չի խոսել,- հաղորդում է Lenta.ru-ն:
