«Ինչո՞ւ եք բողոքում, երբ իշխանությունը ընտրությունների ժամանակ օգտագործում է վարչական ռեսուրսները: Հանրապետական կուսակցությանը չպետք է մեղադրել այս հարցում». այսօրվա ասուլիսում իր զարմանքը հայտնեց ՀՀԿ-ական պատգամավոր Ռաֆիկ Պետրոսյանը:
Թե ինչ է հասկանում ՀՀԿ-ական պատգամավորը «ռեսուրս օգտագործել» ասելով՝ այդպես էլ լրագրողների համար հարցական մնաց: «Եթե համայնքի, գյուղի ղեկավարը հանրապետական է, իր ընտանիքով, հարազատներով գնում է ընտրություններին, էդտեղ կարո՞ղ ես մեղադրել Հանրապետականին, դա՛ է ռեսուրսը»,- իր պատկերացումները վարչական ռեսուրս օգտագործելու վերաբերյալ հայտնեց պատգամավորը:
Ընդդիմադիրների ասածը, թե իրենք չեն կարողանում մեծամասնական կարգով թեկնածուներ առաջադրել, պատգամավորը բնական է համարում: Ըստ նրա՝ Հայաստանում գրանցված 75 կուսակցություններից ընտրություններին մասնակցելու, պետությունը կառավարելու կարողություն ունեն մի քանիսը: «Հայաստանում ունենք 1 ժիգուլիանոց կուսակցություններ: Չի կարելի մեղադրել, թե ինչու 750 համայնքներում հանրապետականներն են ղեկավարում, դա արտացոլում է կուսակցության աշխատանքի իրական վիճակը: Որևէ մեկը մեղք չունի, որ այդ կուսակցություններն այնքան հզոր չեն կամ ժողովրդի վստահությունն այնքան չեն վայելում, որ կարողանան առաջադրել իրենց թեկնածուին»,- ասաց պատգամավորը:
Ինչ վերաբերում է համամասնական ընտրակագի անցնելու վերաբերյալ շատ կուսակցությունների պահանջին, Ռ. Պետրոսյանը հայտնեց. «Ե՛վ «Դաշնակցության», և՛ «Ժառանգության» պատգամավորները Երևանից են և մարզերից գոնե մեկը չկա, իսկ Հանրապետականի և «Բարգավաճ Հայաստանի» շարքերում կան բազմաթիվ պատգամավորներ: Կնշանակի, որ եթե 100 տոկոսանոց համամասնական են դառնում, Ազգային ժողովը կդառնա երևանցիների Ազգային ժողով»:
