«Շիրակ»-ի իվուարցի ֆուտբոլիստ Դիդյե Բորիսը, որը փորձաշրջան է անցնում թիմում, ակումբի պաշտոնական կայքին հարցազրույց տվեց.
– Ինձ «Շիրակ»-ում շատ լավ եմ զգում, այստեղ բոլորը պրոֆեսիոնալ են: Իրենց խաղաոճը շատ հարազատ է ինձ: Բոլորն ինձ շատ լավ ընդունեցին: Այժմ մենք բոլորս լավ ընկերներ ենք: Հաճելի է պրոֆեսիոնալների հետ մարզվելը:
– Քեզ դու՞ր է գալիս Անթալիայում:
– Այո, շատ լավ է անցնում ուսումնամարզական հավաքը: Եղանակն էլ հիանալի է, ամեն ինչ տրամադրում է մարզումների: Այս պայմաններում մեզ մնում է միայն ջանք չխնայել մարզումների ժամանակ:
– Քանի՞ տարեկանից ես սկսել զբաղվել ֆուտբոլով:
– Ես սկսել եմ ֆուտբոլ խաղալ 9 տարեկանից: Սկզբում ես մարզվում էի OSA-ի մարզադպրոցում, որտեղ հինգ տարի մնալուց հետո տեղափոխվեցի «Ասեք» թիմ, այնուհետև մի քանի տարի «Ստելա»-ում խաղալուց հետո կրկին վերադարձա «Ասեք», իսկ այնուհետև պայմանագիր կնքեցի «Սոա»-ի հետ, որը հանդես է գալիս Կոտ դ’ Իվուարի առաջնության բարձրագույն խմբում:
– Ինչպե՞ս ես շփվում թիմակիցներիդ հետ:
– Քանի որ բոլորս պրոֆեսիոնալ ենք, միմյանց հասկանում ենք նույնիսկ առանց որևէ բառի, սակայն ես գիտեմ անգլերեն և կարողանում եմ բացատրել, թե ինչ եմ ուզում և հայերեն մի քանի բառ էլ գիտեմ արդեն. բարի լույս, մենակ ես…
– Շա՞տ տխրեցիր, երբ Կոտ դ’ Իվուարի հավաքականը պարտվեց Աֆրիկայի գավաթի խաղարկության եզրափակիչում:
– Իհարկե, պարտությունը միշտ էլ տխրեցնում է: Սակայն մեր ֆուտբոլիստները լավ պայքարեցին, գեղեցիկ հանդիպում ստացվեց, և Զամբիան իրոք արժանի էր այդ գավաթին: Նրանք շատ ջանք թափեցին և ապացուցեցին բոլորին, որ ուժեղ են:
– Ի՞նչ կասես «Զակարպատիե»-ի հետ հանդիպման մասին:
– Թե՛ «Զակարպատիե»-ն, թե՛ մենք շատ լավ հանդիպում անցկացրինք: Առաջին խաղակեսում համառ պայքար էր ընթանում, սակայն սա սպորտ է, միշտ էլ լինում են հաղթողներ և պարտվողներ: Այս անգամ մեր բախտը չբերեց: Վստահ եմ, որ հաջորդ հանդիպումն ավելի լավ կանցկացնենք:
