Երաժիշտ սըր Փոլ Մաքքարթնին The Rolling Stone ամսագրին տված հարցազրույցում հայտարարել է, որ հրաժարվել է մարիխուանա ծխելուց, քանի որ իր 8-ամյա աղջկան` Բեատրիսին, ցանկանում է լավ օրինակ ծառայել: Այս մասին այսօր գրել է The Daily Telegraph-ը:
«Ես իմն արդեն ծխել եմ, իսկ երբ դաստիարակում ես երեխայի, ինչ-որ պահի, եթե ամեն ինչ լավ է գնում, զարթնում է պատասխանատվությունը: Դրան էլ գումարած` ինձ համար արդեն բավական է»,- ամսագրի հետ զրույցում անկեղծացել է երաժիշտը:
Փ. Մաքքարթնին, սակայն, չի բացատրել` ինչու չէր հրաժարվում թմրանյութերից, երբ դաստիարակում էր իր 4 երեխաներին:
Մաքքարթնին սկսել է մարիխուանա օգտագործել դեռ 1960-ականներից:
Թմրամիջոցներին նրան սովորեցրել էր Բոբ Դիլանը: Մաքքարթնին փորձել է թմրամիջոցների տարբեր տեսակներ` հերոին, կոկաին: 1972 թ. նրան երկու անգամ ձերբակալել էին թմրամիջոցներ պահելու մեղադրանքով, իսկ 1980 թ. Ճապոնիայից վտարեցին, երբ նրա պայուսակում հայտնաբերվեց թմրամիջոցի մեծ քանակություն:
