Today’s Zaman. Թուրքերի մեծ մասը դեմ է Հայաստանի հետ սահմանի բացմանը

Ինչպես փոխանցում է Today’s Zaman թերթը, թուրքերի մեծ մասը դեմ է Հայաստանի հետ սահմանի բացմանը: Հարցումն անցկացրել է Անակարայում գտնվող MetroPOLL ռազմավարական և սոցիալական հետազոտությունների կենտրոնը, որը փորձել է պարզել բնակչության կարծիքը Թուրքիայի համար կարևոր մի շարք ներքին և արտաքին խնդիրների վերաբերյալ:
Այն հարցին, թե արդյո՞ք պետք է բացել Հայաստանի հետ ցամաքայի սահմանը, հարցվածների 50.3%-ը պատասխանել է «ո՛չ»: Դրական պատասխան է տվել 27%-ը, իսկ մնացածը դժվարացել են պատասխանել:
Իսրայելի հետ հարաբերությունների բարելավման կողմ են արտահայտվել հարցվածների 27.9%-ը, իսկ 63%-ը չեն ցանկանում բարելավել հարաբերություններն այդ երկրի հետ: Հարցվածների մոտ 69%-ն էլ մտահոգություն է հայտնել Իրանի միջուկային ծրագրի վերաբերյալ, ինչը նշանակում է, որ իշխանությունների և ժողովրդի կարծիքները բավականին տարբերվում են:
Թուրքերի համար, ըստ հարցման, ամենամեծ վտանգը ներկայացնում է ԱՄՆ-ն` 42.6%, որին հետևում են Իսրայելը` 23.7%, Իրանը` 3%, Հունաստանը` 2.3%, Իրաքը` 2.1%, Ռուսաստանը` 1.7%: Այս «պատվավոր» ցուցակում Հայաստանը տեղ չի զբաղեցրել:
Թուրքերի մեծ մասը` մոտ 53%, շարունակում են աջակցել Թուրքիայի անդմակցությանը Եվրամիությանը, մինչդեռ մոտ 38%-ը հայտարարել է, որ դեմ կքվեարկի, եթե հանրաքվեի հանվի Թուրքիայի անդամակցության հարցն այդ կազմակերպությանը:
Իշխող «Արդարություն և զարգացում» կուսակցությունը շարունակում է վայելել բնակչության մեծամասնության աջակցությունը: Եթե ընտրությունները կայանային եկող հանգստյան օրերին, ապա այդ կուսակցությունը կստանար հարցվածների 45.3%-ը, նրան հաջորդում է Թուրքիայի ժողովրդահանրապետական կուսակցությունը` 30.7%, իսկ մյուս կուսակցություներն ունեն 15%-ից պակաս աջակցություն:
Հարցումն անցկացվել է դեկտեմբերի 25-29 ընկած ժամանակահատվածում, որին մասնակցել է 1504 քաղաքացի: