Աշխարհում խոշորագույն Facebook սոցցանցը մտադիր է փետրվարի վերջին ազատ մատչում տրամադրել Timeline ձևաչափին ընկերությունների պաշտոնական էջերի, բրենդների ու հայտնի անձանց համար: Այս մասին հայտնում է Ad Age պարբերականը:
Timeline ձևաչափը, որն ի սկզբանե նախատեսված էր օգտատերերի անձնական էջերի համար, առաջին անգամ ներկայացվել է 2011 թ. սեպտեմբերին Facebook F8 համաժողովի ժամանակ:
Դեկտեմբերից Facebook սոցցանցի հատուկ էջում Timeline-ը միացնելու հնարավորություն ունեին բոլոր օգտատերերը, իսկ ներկայումս Facebook-ի ծրագրավորողներն աստիճանաբար բոլոր օգտատերերի էջերը պարտադիր միացնում են Timeline-ին:
Սոցցանցի Facebook Pages ձևաչափը առայժմ մնում է նույնը, սակայն Ad Age-ի տվյալով, ընկերությունը Նյու Յորքում մարկետոլոգների համաժողովում փետրվարի 29-ին կհայտարարի Timeline-ին մատչումի մասին:
Timeline-ը թեսթային ռեժիմով հասանելի կլինի այն ընկերություններին ու բրենդներին, որոնք ցանցում վարում են իրենց պաշտոնական Facebook-էջերը,- նշում է պարբերականը:
Facebook-ի ղեկավարությունն առայժմ չի մեկնաբանել սոցցանցի պաշտոնական էջերի համար Timeline-ի գործարկման մասին լուրերը:
Բրենդային էջերի համար Timeline-ի առավելությունը կարող է այն լինել, որ դա հնարավորություն կընձեռի կազմակերպել ամբողջ կորպորատիվ պատմությունը` օգտվելով մուլտիմեդային նյութերից:
Ընկերություններն ու բրենդները կկարողանան մշակել սեփական հավելվածները Open Graph պլատֆորմի վրա, որը թույլ կտա հետևել օգտատերերի ակտիվությանը հրապարակային էջերին: Դիզայնի տեսակետից բրենդների Facebook ռեսուրսները կկարողանան կրեատիվ «շապիկներ» դնել իրենց էջերի վերևի հատվածում:
Ad Age-ի տեղեկությունների հաստատման դեպքում ցանցը նորամուծության շնորհիվ կկարողանա գովազդատուների ու կորպորատիվ հաճախորդների գրավել իր կայքը:
Մյուս կողմից էլ` Timeline-ը թույլ կտա Facebook-ին ակտիվ մրցակցել Google+ սոցցանցի հետ, որը էջեր է թողարկել բրենդների համար:
