Եթե ՀՀ նախկին արտգործնախարար Վարդան Օսկանյանը նամուս ունենար, իրեն իրավունք չէր վերապահի վերադառնալ քաղաքականություն: «Առաջին լրատվական»-ի հետ զրույցում այս մասին ասաց մարտի 1-ի զոհերից Գոռ Քլոյանի հայրը՝ Սարգիս Քլոյանը:
«Չէ՞ որ Օսկանյանը 2008-ին պետական պաշտոնյա էր, գիտեր՝ ինչ պետք է լիներ, նա ամեն ինչից տեղյակ էր: Հիմա այդ մարդն ի՞նչ երեսով է կրկին մտնում քաղաքական դաշտ: Ես դա համարում եմ շատ վտանգավոր ու քողարկված քայլ: Թե վերջն ի՞նչ է լինելու, չգիտեմ, բայց Վարդան Օսկանյանն իրավունք չունի վերադառնալ քաղաքականություն, նա մարտի 1-ի հանցագործներից մեկն է: Այն ժամանակ Օսկանյանը պետական գործիչ էր, ԱԳ նախարարի պաշտոնն էր զբաղեցնում և տեղյակ էր մտցվող արտակարգ իրավիճակին: Հետևաբար, կարող էր Ռոբերտ Քոչարյանին ասել, որ իրավունք չունեն բանակը ներգրավել գործողություններում, կարող էր ասել, որ չկրակեն սեփական ժողովրդի վրա, նա կարող էր միջնորդել այս հարցերում»,- ասաց Սարգիս Քլոյանը:
Հիշեցնենք՝ երեկ հայտնի դարձավ, որ «Սիվիլիթաս» հիմնադրամի խորհրդի նախագահ Վարդան Օսկանյանը ԲՀԿ-ին անդամակցելու դիմում է ներկայացրել՝ հիմնավորելով, որ երկրի քաղաքական գործընթացներին իր ավելի ակտիվ մասնակցության ժամանակն է, և համոզմունք հայտնելով, որ «Բարգավաճ Հայաստանը» այլ քաղաքական ուժերի հետ կարող է քաղաքական մրցակցության շնորհիվ ապահովել ազատ և արդար ընտրություններ:
