PepsiCo-ն նոր ռազմավարության կդիՄի Tropicana նարնջի հյութերի վաճառքն ավելացնելու նպատակով: Կորպորացիան հյութը կնոսրացնի սովորական խմելու ջրով: Այս մասին հաղորդում է Bloomberg գործակալությունը:
PepsiCo-ի հյութերի դեպարտամենտի ղեկավար Մասիմո դե Ամորեն բացատրել է նոր ռազմավարությունը նրանով, որ շատ գնորդներ իրենք են նարնջի հյութը բացում ջրով` ցանկանալով նոսրացնել հյութն ու նվազեցնել կալորիաների քանակը:
«Նրանք անձամբ են ջուր ավելացնում մինչ հյութն ըմպելը: Իսկ ինչո՞ւ մենք միանգամից այն չավելացնենք ու դրա դիմաց գումար չգանձենք»,- ասել է նա:
Tropicana նարնջի հյութը, որն ԱՄՆ-ում ամենից շատ վաճառվող հյութերից է, ներկայումս փորձում է առաջատարի դիրք գրավել այն բանից հետո, երբ 3 տարի առաջ կորցրեց շուկայում իր մասնաբաժինն ու տեղը զիջեց Coca-Cola կորպորացիայի հյութերին:
Փոխանակ համապատասխանելու Coca-Cola-ի 100 տոկոսանոց նարնջի հյութին, դե Ամորեն շեշտը դնում է ավելի քիչ քանակությամբ նարնջի պարունակության հյութի վրա` դրանով ցանկանալով մեծացնել վաճառքի ծավալներն ու շահույթը։
Այսպես, Tropicana-ն կլինի 42 տոկոսանոց նարնջի հյութ:
Ներկայումս Coca-Cola-ն ծրագրում է շարունակել շուկայից դուրս մղել Tropicana Pure Premium բրենդը: Ընկերությունը դեռ անցած տարի է սկսել Minute Maid Pure Squeezed հյութերի վաճառքը ոչ թանկ գնով:
Հունվարին նարջի հյութի ֆյուչերսները ռեկորդային գին արձանագրեցին` հասնելով վերջին 34 տարում առավելագույնին, երբ ԱՄՆ-ի սննդի որակի կարգավորողն արգելեց Բրազիլիայից ներմուծել հյութեր ու մրգեր, որոնց արտադրության ժամանակ օգտագործվել են ֆունգիցիդներ (հակասնկային դեղամիջոցներ):
