Մաշտոցի պուրակում շարունակվում է նստացույցը: Արդեն 5-6 օր է, ինչ «Մենք ենք այս քաղաքի տերը», «Մեր քաղաքը» քաղաքացիական նախաձեռնությունների անդամները, բնապահպանները նստացույց են կազմակերպել Մաշտոցի պուրակում` ի պաշտպանություն պուրակի:
Ինչպես «Առաջին լրատվական»-ին տեղեկացրեց բնապահպան, ակտիվիստ Եղիա Ներսիսյանը, նստացույցը կշարունակվի պուրակում, քանի դեռ էլիտար կրպակները մեկ ուրիշ վայրում տեղադրելու որոշում չի կայացվել: «Երեկ քաղաքապետի հետ հանդիպեցինք այս հարցով, և դեռ քննարկումները շարունակվում են: Պետք է աշխատանքային խումբ ձևավորվի այս հարցը քննարկելու և էլիտար կրպակների տեղադրման որոշումը վերանայելու համար»,- նշեց նա:
Այն հարցին, թե ինչպե՞ս կգնահատի քաղաքապետի հետ հանդիպումը, Ե. Ներսիսյանը պատասխանեց, որ գոհ չէ: Ըստ նրա` քաղաքապետը կարող էր հաշվի առնել, որ երիտասարդները եղանակային դժվար պայմաններում արդեն 5 օր է՝ չեն հեռանում պուրակից, և խնդրին ավելի հեշտ լուծում տար, մինչդեռ, Եղիա Ներսիսյանի համոզմամբ, հարցը ձգձգվում է, ինչի կարիքը չկա, քանի որ իրենք մնալու են իրենց պնդմանը` Մաշտոցի պուրակում չպետք է կրպակներ տեղադրվեն:
Նշենք, որ երեկ քաղաքապետի հետ հանդիպմանը ներկա է եղել ԱԺ «Ժառանգություն» խմբակցության պատգամավոր Անահիտ Բախշյանը, ԱԺ ՀՅԴ խմբակցության պատգամավոր Լիլիթ Գալստյանը, «Հանուն կայուն մարդկային զարգացման» ՀԿ նախագահ, բնապահպան Կարինե Դանիելյանը, բնապահպան Եղիա Ներսիսյանը, «Թրանսփերենսի ինթերնեյշնլ» հակակոռուպցիոն կազմակերպությունից Սոնա Այվազյանը, «Մենք ենք այս քաղաքի տերը» քաղաքացիական նախաձեռնության ակտիվիստ Գայանե Մելքոմյանը, քաղաքապետարանի մի քանի ներկայացուցիչներ և Երևանի քաղաքապետ Տարոն Մարգարյանը:
Հիշեցնենք, որ դեկտեմբեր ամսին Աբովյան փողոցից ապամոնտաժվեցին էլիտար կրպակները և որոշում կայացվեց դրանք տեղադրել Գլխավոր պողոտայում, ընդունված է ասել՝ Մաշտոցի պուրակում`առանց հաշվի առնելու հասարակության կարծիքը:
