Քանի որ ՀՀ նախկին արտգործնախարար Վարդան Օսկանյանը Հայաստանի երկրորդ նախագահ Ռոբերտ Քոչարյանի թևի ներկայացուցիչներից է, իսկ «Բարգավաճ Հայաստան» կուսակցությունն էլ վերջինիցս հեռու կանգնած կառույց չէ, ապա Օսկանյանի՝ ԲՀԿ-ին անդամակցելու դիմում գրելու մեջ անսպասելի ոչինչ չկա: «Առաջին լրատվական»-ի հետ զրույցում նման տեսակետ հայտնեց Հայ ազգային կոնգրեսի ներկայացուցիչ Գուրգեն Եղիազարյանը:
«Այս ամենը ես շատ բնական եմ դիտարկում: Իհարկե, Օսկանյանի վերադարձը Ռոբերտ Քոչարյանի վերադարձի փորձ կատարելու սկիզբն է, իսկ հաջորդ քայլերը կերևան մեկ ամսից»,- ասաց ՀԱԿ ներկայացուցիչը:
Հիշեցնենք, որ ՀՀ նախկին ԱԳ նախարար Վարդան Օսկանյանը դիմում է ներկայացրել «Բարգավաճ Հայաստան» կուսակցությանն անդամակցելու նպատակով: «Երեկ ես դիմում եմ ներկայացրել «Բարգավաճ Հայաստան» կուսակցությանն անդամակցելու համար։ Այդ որոշումը կայացրել եմ, քանի որ համոզված եմ, որ «Բարգավաճ Հայաստան» կուսակցությունը, այլ քաղաքական ուժերի հետ միասին, կարող է քաղաքական մրցակցության շնորհիվ ապահովել ազատ և արդար ընտրություններ, հետևաբար նաև նոր խորհրդարան՝ քաղաքական ուժերի նոր դասավորությամբ։ Այսօր գտնում եմ, որ ժամանակն է, որ ավելի ակտիվ մասնակցություն ունենամ երկրի քաղաքական գործընթացներին»,- նշել է Օսկանյանը:
